അബുദാബി: ഇത്തവണത്തെ സ്വാതന്ത്ര്യദിനം വ്യത്യസ്തമായി ആചരിച്ച് 'എ ഫോർ അഡ്വഞ്ചർ' സംഘാംഗങ്ങൾ. സമുദ്രനിരപ്പിൽ നിന്ന് 1200 അടി ഉയരയായി യുഎഇയിലെ ഖോർ ഫക്കാനിലുള്ള റാഫിസ് ഡാം മലനിരപ്പിലായിരുന്നു സംഘം ഇന്ത്യൻ പതാക ഉയർത്തിയത്. കുട്ടികളും മുതിർന്നവരും ഉൾപ്പെടെ നൂറിലധികം പേരാണ് സംഘത്തിലുണ്ടായിരുന്നത്.

സ്വാതന്ത്ര്യ ദിനാഘോഷത്തിന്റെ ഭാഗമായി പുലർച്ചെ തന്നെ മലനിരപ്പിലേയ്ക്ക് സംഘം യാത്ര തുടങ്ങിയിരുന്നു. തുടർന്നാണ് മലനിരപ്പിലെ ഏറ്റവും ഉയരത്തിൽ ഇന്ത്യൻ പതാക ഉയർത്തിയത്. ദേശീയ ഗാനങ്ങൾ ആലപിച്ചും, ഐക്യതയുടെ സന്ദേശങ്ങൾ കൈമാറിയും മധുരപലഹാരങ്ങൾ വിതരണം ചെയ്തുമായിരുന്നു യാത്ര. മലമുകളിൽ വിവിധ സാംസ്‌കാരിക പരിപാടികളും നടത്തി. 1,200 അടി ഉയരത്തിൽ നൂറുകണക്കിന് ഇന്ത്യൻ പതാകകൾ നാട്ടിയതാണ് ആഘോഷങ്ങളിലെ മുഖ്യആകർഷണം.

ഇതാദ്യമായല്ല സംഘം വ്യത്യസ്തമായ സാഹസിക യാത്രകൾ നടത്തുന്നത്. ഓണം, ഈദ്, ക്രിസ്‌മസ് തുടങ്ങിയവയും വ്യത്യസ്ത രീതിയിൽ മലമുകളിലേയ്ക്ക് ട്രക്കിംഗ് നടത്തിയാണ് സംഘം ആഘോഷിച്ചത്. എ ഫോർ അഡ്വഞ്ചർ സ്ഥാപകൻ ഹരി കോട്ടച്ചേരി സ്വാതന്ത്ര്യദിനാഘോഷത്തിനിടെ ആശംസകൾ നേർന്നു. അദ്‌നൻ കാലടി, വിഷ്‌‌ണു മോഹൻ, അക്ഷര, അലീന എന്നിവരാണ് പരിപാടിയുടെ നേതൃത്വം വഹിച്ചത്.