കോട്ടയം: പ്രശസ്‌ത സിനിമാ സംവിധായകൻ നിസാർ അബ്‌ദുൾ ഖാദർ (63) അന്തരിച്ചു. കരൾ - ശ്വാസകോശ സംബന്ധമായ അസുഖങ്ങളെത്തുടർന്ന് ചികിത്സയിലിരിക്കെ ആയിരുന്നു അന്ത്യം. കോട്ടയം ചങ്ങനാശേരി സ്വദേശിയാണ് നിസാർ. സംസ്‌കാരം നാളെ ചങ്ങനാശേരി പഴയ പള്ളി കബർസ്ഥാനിൽ നടക്കും.

1994 മുതൽ മലയാളം സിനിമയിൽ സജീവമായ നിസാർ 27 ചിത്രങ്ങൾ സംവിധാനം ചെയ്‌തിട്ടുണ്ട്. ജയറാമും ദിലീപും പ്രധാനവേഷങ്ങളിലെത്തിയ 'സുദിനം' ആണ് ആദ്യ ചിത്രം. ത്രീമെൻ ആർമി, മലയാളമാസം ചിങ്ങം ഒന്ന്, ന്യൂസ് പേപ്പർ ബോയ്, അപരന്മാർ നഗരത്തിൽ, ഓട്ടോബ്രദേഴ്‌സ്, ഡ്യൂപ്പ് ഡ്യൂപ്പ് ഡ്യൂപ്പ്, ജഗതി ജഗദീഷ് ഇൻ ടൗൺ, കളേഴ്‌സ് തുടങ്ങിയവയാണ് അദ്ദേഹത്തിന്റെ പ്രധാന ചിത്രങ്ങൾ. 2023ൽ പുറത്തിറങ്ങിയ ടുമെൻ ആർമിയാണ് അവസാന ചിത്രം.