ഒറ്റപ്പാലം: വിദ്യാലയത്തിന്റെ ഭൗതിക അക്കാഡമിക് നിലവാരം ഉയർത്തുകയെന്ന ലക്ഷ്യത്തോടെ ഒറ്റപ്പാലം ഗവ.ബധിര വിദ്യാലയത്തിൽ നടപ്പാക്കുന്ന മികവിന്റെ കേന്ദ്രം പദ്ധതിയുടെ ഉദ്ഘാടനം അഡ്വ.കെ.പ്രേംകുമാർ എം.എൽ.എ നിർവഹിച്ചു. വിദ്യാലയത്തിലെ കുട്ടികളുടെ പാർക്കിന് മേൽക്കൂര നിർമ്മിക്കാൻ എം.എൽ.എ ഫണ്ടിൽ നിന്നും അഞ്ച് ലക്ഷം രൂപ അനുവദിച്ചതായി എം.എൽ.എ അറിയിച്ചു. പൊതു വിദ്യാഭ്യാസ വകുപ്പിന്റെ 2024-25 വർഷത്തെ പ്ലാൻ ഫണ്ടിൽ നിന്നും 25 ലക്ഷം രൂപ വിനിയോഗിച്ച് അക്കാഡമിക്, ഭൗതികം, സാമൂഹ്യം, സൗന്ദര്യവത്കരണം എന്നിങ്ങനെ നാല് മേഖലകളായി തിരിച്ചാണ് പദ്ധതികൾ യാഥാർത്ഥ്യമാക്കുന്നത്. ഫിസിക്സ്, കമ്പ്യൂട്ടർ, സ്പീച്ച് ലാബുകളും ഓഡിയോളജി, ലൈബ്രറി മുറികളും നവീകരിച്ചു. ശ്രവണ വൈകല്യമുള്ള കുട്ടികൾക്ക് ഗ്രൂപ്പ് ഹിയറിംഗ് സിസ്റ്റം ഉപയോഗിച്ചുള്ള പ്രവർത്തനവും ഓഡിയോഗ്രാം നടത്താനുള്ള പ്രാഥമിക സൗകര്യങ്ങളും ഒരുക്കിയിട്ടുണ്ട്. കളിസ്ഥലം, പ്രത്യേക പാർക്ക്, ലോംഗ് ജമ്പ് പിറ്റ് എന്നിവ തയ്യാറാക്കി. പഠനത്തോടൊപ്പം കുട്ടികൾക്ക് സ്വയം പര്യാപ്തത കൈവരിക്കുന്നതിനായി തയ്യൽ പരിശീലനവും വിദ്യാലയത്തിനോട് ചേർന്ന് നടത്തുന്നുണ്ട്. ഹൈസ്‌കൂൾ, ഹയർസെക്കൻഡറി വിദ്യാർത്ഥികൾക്കും രക്ഷിതാക്കൾക്കുമാണ് തയ്യൽ പരിശീലനം നൽകുന്നത്. പരിശീലനം ലഭിച്ച രക്ഷിതാക്കളാണ് ഈ വർഷത്തെ വിദ്യാർത്ഥികളുടെ യൂണിഫോം തയ്യാറാക്കിയത് എന്നത് പദ്ധതിയുടെ വിജയമാണ്.

30 സെന്റിൽ വിപുലമായ കൃഷിയിടവും വിദ്യാലയത്തിൽ മികവിന്റെ കേന്ദ്രം പദ്ധതിയുടെ ഭാഗമായി നടത്തി വരുന്നുണ്ട്. വാഴത്തോട്ടം തക്കാളി, പച്ചമുളക്, വഴുതനങ്ങ, ചേന, ചേമ്പ് തുടങ്ങിയ പച്ചക്കറികൾ കൃഷി ചെയ്തു വിദ്യാലയത്തിലെ ഉച്ചഭക്ഷണത്തിന് പ്രയോജനപ്പെടുത്തും. ഒറ്റപ്പാലം നഗരസഭ ചെയർപേഴ്സൺ ജാനകി ദേവി അദ്ധ്യക്ഷയായി. സ്ഥിരം സമിതി അദ്ധ്യക്ഷൻ അബ്ദുൾ നാസർ, വാർഡ് കൗൺസിലർ മണികണ്ഠൻ, സ്‌കൂൾ പ്രധാന അദ്ധ്യാപിക മിനികുമാരി, പ്രിൻസിപ്പൽ ലബീന, പി.ടി.എ പ്രസിഡന്റ് ശിവശങ്കരൻ, സ്റ്റാഫ് സെക്രട്ടറി സാജിത തുടങ്ങിയവർ പങ്കെടുത്തു. വിദ്യാർത്ഥികൾ തയ്യാറാക്കിയ കരകൗശല വസ്തുക്കളുടെ പ്രദർശനവും നടത്തി.