അലനല്ലൂർ: വിദ്യാർത്ഥികളിൽ ജനാധിപത്യ ബോധം നൽകി അവരെ ഉത്തമ പൗരൻമാരാക്കുകയെന്ന ലക്ഷ്യത്തോടെ എടത്തനാട്ടുകര ഗവ.ഓറിയന്റൽ ഹൈസ്‌കൂളിൽ നടന്ന പാർലമന്റ് തെരഞ്ഞെടുപ്പ് വിദ്യാർത്ഥികൾക്ക് നവ്യാനുഭവമായി. സ്‌കൂളിലെ സോഷ്യൽ സയൻസ് ക്ലബ്ബിന്റെ ആഭിമുഖ്യത്തിൽ നടത്തിയ വോട്ടെടുപ്പിൽ 2,500 ലേറെ
വിദ്യാർത്ഥികൾ വോട്ടാവകാശം വിനിയോഗിച്ചു. തെരഞ്ഞെടുപ്പിനു മുന്നോടിയായി തെരഞ്ഞെടുപ്പ് വിജ്ഞാപനം, നാമ നിർദ്ദേശക പത്രിക സ്വീകരണം, സ്ഥാനാർത്ഥികളുടെ മീറ്റ് ഇൻ കാന്റിഡേറ്റ്സ് പ്രോഗ്രാം, പ്രചാരണം എന്നിവയും സംഘടിപ്പിച്ചു. ബാലറ്റ് പേപ്പർ ഉപയോഗിച്ച് വിദ്യാർത്ഥികൾ ക്ലാസ് ലീഡർമാരെ തെരഞ്ഞെടുത്തു. വോട്ടെടുപ്പിന്റെ ഭാഗമായി പേരു വിളിച്ച് രജിസ്റ്ററിൽ ഒപ്പു വെക്കൽ, വിരലിൽ മഷിപുരട്ടൽ, രഹസ്യമായി വോട്ട് ചെയ്യൽ, സ്ഥാനാർത്ഥികളുടെ സാനിദ്ധ്യത്തിൽ വോട്ടെണ്ണി വിജയികളെ തെരഞ്ഞെടുക്കൽ എന്നിവയും നടന്നു. വിദ്യാർത്ഥികളുടെ കഴിവുകളെ അടിസ്ഥാനമാക്കി നടത്തിയ തെരഞ്ഞെടുപ്പിൽ സ്‌കൂൾ ചെയർ പേഴ്സണായി സി.പി.നിദ ജന്ന, വൈസ് ചെയർപേഴ്സണായി ടി.കെ.ഷന തസ്നി, സ്‌കൂൾ ലീഡറായി ബി.എച്ച്.ചന്ദന, ഡെപ്യൂട്ടി ലീഡറായി ഒ. മുഹമ്മദ് റാഹിഫ് എന്നിവരെ തെരഞ്ഞെടുത്തു. പ്രവർത്തങ്ങൾക്ക് അദ്ധ്യാപകരായ കെ.ടി.സിദ്ധീഖ്, ടി.ബി.ഷൈജു, മുനീറ ബീഗം, ടി.പി.രാധിക, വി.പി.അബൂബക്കർ, ടി.വിനീത, കെ.ജി.സുനീഷ്, സി.ബഷീർ, പി.അബ്ദുസ്സലാം, സി.സിദ്ദീഖ്, എൻ.നസീർ എന്നിവർ നേതൃത്വം നൽകി.