കൊല്ലം: സൗഹൃദം മഹാവൃക്ഷമായി വളരട്ടെ എന്ന ആശയവുമായി ഇന്റർനാഷണൽ സൗഹൃദ ദിനമായ ഇന്ന് ഹരിതകേരളം മിഷൻ ‘ഒരു തൈ നടാം’ ജനകീയ വൃക്ഷവത്കരണ ക്യാമ്പയിനുമായി രംഗത്ത്. സ്കൂളുകൾ, കലാലയങ്ങൾ, ഓഫീസുകൾ, സ്ഥാപനങ്ങൾ, വായനശാലകൾ, ക്ലബുകൾ, സന്നദ്ധ സംഘടനകൾ, കുടുംബശ്രീ അയൽക്കൂട്ടങ്ങൾ തുടങ്ങിയ സ്ഥലങ്ങളിൽ സുഹൃത്തുക്കൾക്ക് നട്ടുവളർത്താൻ വൃക്ഷത്തൈകൾ പരസ്പരം കൈമാറിയാണ് പരിപാടി സംഘടിപ്പിക്കുന്നത്. ഹരിത കേരളം മിഷന്റെ ആഭിമുഖ്യത്തിൽ സൃഷ്ടിച്ച പച്ചത്തുരുത്തുകളിലും തൈകൾ നടും. പുതിയ പച്ചത്തുരുത്തുകൾക്കും തുടക്കം കുറിക്കും.
പരിസ്ഥിതി പുനഃസ്ഥാപനം, നെറ്റ് സീറോ കാർബൺ കേരളം എന്നിവ മുൻനിറുത്തിയാണ് വൃക്ഷത്തൈ കൈമാറ്റം. ചങ്ങാതിയുടെ പേരിൽ മണ്ണിലൊരു തൈ നട്ട് പരിപാലിക്കുന്നതിലൂടെ മണ്ണും മനുഷ്യനും തമ്മിലുള്ള ജൈവബന്ധവും സുഹൃത്തുക്കൾ തമ്മിലുള്ള ആത്മബന്ധവും മഹാവൃക്ഷം പോലെ വളരട്ടെയെന്ന സന്ദേശംകൂടി ഇതിലൂടെ കുട്ടികളിലെത്തും.


ഒരുക്കുന്നത് 5 ലക്ഷം തൈകൾ
 ജില്ലയിൽ ഈ വർഷം നടാൻ ലക്ഷ്യമിടുന്നത് അഞ്ച് ലക്ഷം വൃക്ഷത്തൈകൾ

 ഇതുവരെ നട്ടുപിടിപ്പിച്ചത് മൂന്ന് ലക്ഷം

 അടുത്ത മാസത്തിനുള്ളിൽ ലക്ഷ്യത്തിലെത്തും