കൊല്ലം: പത്തനാപുരത്ത് വനിതാ ദന്തഡോക്ടറെ വായിൽ തുണിതിരുകി പീഡിപ്പിക്കാൻ ശ്രമിച്ച കേസിൽ പ്രതി കുണ്ടയം കാരംമൂട് സൽദാൻ മൻസിലിൽ മുഹമ്മദ് സൽദാനെ (24) പത്തനാപുരം ജുഡീഷ്യൽ മജിസ്ട്രേറ്റ് കോടതി റിമാൻഡ് ചെയ്തു. ആദ്യം കേസ് പരിഗണിച്ച കടയ്ക്കൽ മജിസ്ട്രേറ്റ് കോടതി വ്യവസ്ഥകളോടെ ജാമ്യം നൽകിയ പ്രതിയെയാണ് കൂടുതൽ വകുപ്പുകൾ ചേർത്ത് റിമാൻഡ് ചെയ്തത്. 329 (3), 126 (2), 74 വകുപ്പുകൾക്ക് പുറമെ ലൈംഗികാതിക്രമത്തിനുള്ള വകുപ്പും ഹോസ്പിറ്റൽ ആക്ടും ചേർത്താണ് ഇന്നലെ കോടതി മുമ്പാകെ പ്രതിയെ ഹാജരാക്കിയത്. കൂടുതൽ അന്വേഷണത്തിന് പ്രതിയെ കസ്റ്റഡിയിൽ വാങ്ങാൻ അന്വേഷണ സംഘം അപേക്ഷ നൽകും. 26ന് വൈകിട്ട് 6.30ന് ക്ളിനിക്ക് അടച്ച് വീട്ടിൽ പോകാനുള്ള തയ്യാറെടുപ്പ് നടത്തുമ്പോഴാണ് പ്രതി ഡോക്ടർക്കുനേരെ അതിക്രമം കാട്ടിയത്.