കൊല്ലം: കെ.സി.എൽ രണ്ടാം സീസണിൽ വിവിധ ടീമുകൾക്കായി കളത്തിലിറങ്ങുന്നത് കൊല്ലം ക്രിക്കറ്റ് അസോസിയേഷനിലെ ഒൻപത് താരങ്ങൾ. ഇതിൽ ആറുപേരും കൊല്ലം ടീമിന് വേണ്ടിയാണ് കളിക്കുന്നത്. രാഹുൽ ശർമ്മ, അതുൽജിത്ത് അനു, എ.ജി.അമൽ, ആഷിഖ് മുഹമ്മദ്, പി.എസ്.സച്ചിൻ, എൻ.എസ്.അജയഘോഷ് എന്നിവരാണ് ഏരീസ് കൊല്ലം സെയിലേഴ്‌സിനായി കളിക്കാനിറങ്ങുക.

രാഹുൽ ശർമ്മ, ആഷിഖ് മുഹമ്മദ് എന്നിവരെ ഏരീസ് കൊല്ലം സെയിലേഴ്സ് ലേലത്തിലൂടെ സ്വന്തമാക്കുകയായിരുന്നു. നിർണായക ഘട്ടത്തിൽ മികച്ച ബാറ്റിം​ഗ് പുറത്തെടുക്കാൻ സാധിക്കുന്ന താരമാണ് രാഹുൽ ശർമ്മ. ആഷിഖ് മുഹമ്മദാകട്ടെ കഴിഞ്ഞ സീസണിൽ ഏരീസ് കൊല്ലം സെയിലേഴ്‌സിനായി മികച്ച ബൗളിംഗ് കാഴ്ചവച്ചിരുന്നു. കഴിഞ്ഞ തവണ കൊച്ചി ബ്ലൂ ടൈഗേഴ്‌സ് വേണ്ടി കളിച്ച ഫാസ്റ്റ് ബൗളർ അജയഘോഷിനെ അടിസ്ഥാന വിലയായ 75000 രൂപയ്ക്കാണ് ഏരീസ് കൊല്ലം സെയിലേഴ്സ് സ്വന്തമാക്കിയത്.

ഇടംകൈയൻ ഫാസ്റ്റ് ബൗളറും കേരള അണ്ടർ 19 താരവുമായ ടി.എസ്.വിനിലിനെ അദാനി ട്രിവാൻഡ്രം റോയൽസ് നിലനിറുത്തി. 1.5 ലക്ഷം രൂപയ്ക്കാണ് വിനിലിനെ ട്രിവാൻഡ്രം റോയൽസ് ടീമിലെത്തിച്ചത്. വെടിക്കെട്ട് ബാറ്ററും വിക്കറ്റ് കീപ്പറുമായ അ​ദ്വൈത് പ്രിൻസിനെയും അദാനി ട്രിവാൻഡ്രം റോയൽസാണ് സ്വന്തമാക്കിയത്. 75,000 രൂപയാണ് അദ്വൈത് പ്രിൻസിന് ലഭിച്ച ലേലത്തുക. ഓൾ റൗണ്ടറായ അക്ഷയ് മനോഹറിനെ തൃശൂർ ടൈറ്റൻസ് 3.50 ലക്ഷം രൂപയ്ക്കാണ് ടീമിലെത്തിച്ചത്.