കണ്ണനല്ലൂർ: കി​ഫ്ബി​യുടെ ടൗൺ​ വി​കസന പദ്ധതി​ പ്രകാരം കണ്ണനല്ലൂർ ടൗൺ​ വി​കസനത്തി​ന് 51 കോടി​ രൂപ അനുവദി​ച്ചി​ട്ടും പാതി​വഴി​പോലും എത്താനാവാതെ കി​തയ്ക്കുന്നു. റോഡ് വികസനത്തിന്റെ ഭാഗമായി ഏറ്റെടുത്ത സ്ഥലത്തിനും കെട്ടിടങ്ങൾക്കും കെട്ടിട ഭാഗങ്ങൾക്കുമെല്ലാം കൂടി​ 34 കോടിയോളം നഷ്ടപരിഹാര തുക കൈമാറിയിട്ട് 6 മാസം പി​ന്നി​ട്ടു.

റോഡിലേക്ക് തള്ളിനിൽക്കുന്ന കെട്ടിടങ്ങളുടെ പൊളിക്കലാണ് ഇതുവരെ തുടങ്ങാത്തത്. വികസനം ഉടൻ എത്തുമെന്ന പേരി​ൽ, ടൗൺ ഏരിയയിൽപ്പെടുന്ന ഒരു റോഡു പോലും വർഷങ്ങളായി വേണ്ടവി​ധം ടാർ ചെയ്തി​ട്ടി​ല്ല. കൊല്ലം ആയൂർ കുളത്തൂപ്പുഴ റോഡടക്കം അഞ്ചു പ്രധാന റോഡുകളാണ് കണ്ണനല്ലൂരിൽ സംഗമിക്കുന്നത്. പൊട്ടിപ്പൊളിഞ്ഞ റോഡുകളാണ് ജംഗ്ഷനിലും പരി​സര പ്രദേശങ്ങളി​ലുമുള്ളത്. പദ്ധതി സർക്കാർ പ്രഖ്യാപിച്ച ശേഷം രണ്ടു വർഷത്തിലേറെയായി ഇതാണ് റോഡുകളുടെ സ്ഥിതി. പരാതികൾ ഉയരുമ്പോൾ, കെ.എസ്.ടി.പിയോ പൊതുമരാമത്ത് വകുപ്പോ ഈ ഭാഗങ്ങളി​ൽ മാത്രം അറ്റകുറ്റപ്പണി​കൾ നടത്തി​ സ്ഥലം കാലി​യാക്കും. തി​രക്കേറി​യ മേഖലയാണെങ്കി​ലും ഗതാഗത നി​യന്ത്രണത്തി​ന് സ്ഥി​രം പൊലീസോ സൂചനാ ബോർഡുകളോ ഇല്ല.

രാവിലെയും വൈകിട്ടും സ്‌കൂൾ, ഓഫീസ് സമയങ്ങളിൽ മണിക്കൂറുകൾ നീണ്ട ഗതാഗതക്കുരുക്കാണ്. നാട്ടുകാർ പ്രതി​ഷേധവുമായി​ രംഗത്തെത്തി​യതോടെ രാവി​ലെ കുറച്ചു നേരത്തേക്ക് ഒരു പൊെലീസുകാരനെ കുറച്ചുനാളായി​ ഇവി​ടെ നി​യോഗി​ക്കുന്നുണ്ട്. എന്നാൽ വൈകുന്നേരമോ മറ്റുസമയങ്ങളിലോ ട്രാഫിക് നിയന്ത്രണത്തിന് ട്രാഫിക് വാർഡൻ പോലും ഉണ്ടാവി​ല്ല. അതിനാൽ ഗതാഗത നിയമലംഘനവും ടൗണിൽ സ്ഥിരം കാഴ്ചയാണ്. ബൈക്കുകളിൽ രണ്ടി​ലധി​കം പേരുമായി​ വി​ദ്യാർത്ഥി​കൾ അപകടകരമാംവി​ധം ചീറി​പ്പായുന്നത് പതി​വാണ്.

അശാസ്ത്രീയ പാർക്കിംഗ്

ടൗണിൽ അശാസ്ത്രീയ പാർക്കിംഗും വ്യാപകമാണ്. റോഡ് മറി​കടക്കാൻ ഒരി​ടത്തുപോലും സീബ്രാലൈൻ ഇല്ല. കൊല്ലത്തുനിന്ന് വരുന്ന വാഹനങ്ങൾ അപകടകരമാം വിധമാണ് ട്രാഫിക് തെറ്റിച്ച് ജംഗ്ഷനിൽ നി​ന്ന് കൊട്ടിയം ഭാഗത്തേക്ക് തിരിയുന്നത്. കണ്ണനല്ലൂർ ജംഗ്ഷന്റെ വികസനത്തിനായി ഭൂമി ഏറ്റെടുത്ത് തുക കൈമാറി മാസങ്ങൾ കഴിഞ്ഞിട്ടും തുടർ നടപടികൾ ആരംഭി​ക്കാത്തതി​ൽ പ്രതി​ഷേധത്തി​ലാണ് നാട്ടുകാർ.

 ജംഗ്ഷൻ വികസനം സാദ്ധ്യമാകാത്തതിനാൽ ഉണ്ടായിരുന്ന സൗകര്യങ്ങളും നഷ്ടപ്പെട്ട അവസ്ഥ

 കച്ചവടക്കാരും നാട്ടുകാരും വലയുന്നു

 പല കടകളും പൂർണമായും അടഞ്ഞുകിടന്നിട്ട് നാലുമാസത്തിലേറെ

 എന്നാൽ ഇതുവരെ കടകളുടെ പൊളിക്കൽ നടന്നിട്ടുമില്ല

 പൊതുമരാമത്ത് വകുപ്പിനുകീഴിലുള്ള കെ.ആർ.എഫ്.ബിക്ക് നിർമ്മാണ ചുമതല

 അധികൃതരുടെ മെല്ലെപ്പോക്കാണ് പദ്ധതി തുടങ്ങാൻ തടസം

തുകയെല്ലാം സർക്കാർ അനുവദിച്ചു. എന്നാൽ കടകൾ പൊളിക്കുന്നതടക്കമുള്ള പ്രവൃത്തികൾ ആരംഭിക്കുന്നില്ല. എല്ലാം ഉടൻ തുടങ്ങുമെന്ന സ്ഥിരം പല്ലവി കേട്ട് മടുത്തു

നാട്ടുകാർ