കൊല്ലം: ഇരവിപുരത്തുകാർക്ക് ശല്യമായി​ മാറി​യ കള്ളൻ, വഞ്ചിക്കോവിൽ ശ്രീശരവണ ക്ഷേത്രത്തി​ലെ രണ്ടാം മോഷണ ശ്രമത്തി​നി​ടെ സി​.സി​ ടി.വി​ ക്യാമറയി​ൽ കുടുങ്ങി​. ആളെ തി​രി​ച്ചറി​ഞ്ഞ ക്ഷേത്ര ഭാരവാഹി​കളും നാട്ടുകാരും ചേർന്ന് പ്രതി​യെ പി​ടി​കൂടി​ പൊലീസി​ൽ ഏൽപ്പി​ച്ചു.

മുണ്ടയ്ക്കൽ ലക്ഷ്മിനഗർ-271ൽ റീന ഹൗസിൽ സഫറിൻ (67) ആണ് പിടിയിലായത്. ഇന്നലെ പുലർച്ചെ ക്ഷേത്രത്തി​ലെത്തി​യ ഇയാൾ രണ്ട് വഞ്ചികൾ കൂടി കുത്തിത്തുറന്ന് പണം അപഹരിച്ചു. രണ്ട് ദിവസം മുൻപ് ഇവിടെ മോഷണം നടന്നി​രുന്നു. അന്ന് പൊട്ടിച്ചത് കൂടാതെ മറ്റ് രണ്ട് വഞ്ചികൾ കൂടി പ്രതി​ നോക്കിവച്ചിരുന്നു. ഇന്നലെ അതാണ് തുറന്നത്. ഇയാൾ വരുന്നതും മതിൽ ചാടി തിരികെ പോകുന്നതുമൊക്കെ സി.സി.ടി.വി ക്യാമറയിൽ പതിഞ്ഞു. ആദ്യ മോഷണ സമയം ക്ഷേത്രത്തി​ലെ സി​.സി​.ടി​.വി​ ക്യാമറ തകരാറി​​ലായി​രുന്നു. തുടർന്നണ് അറ്റകുറ്റപ്പണി​ നടത്തി​ ക്യാമറ പ്രവർത്തന സജ്ജമാക്കി​യത്. മിന്നായം പോലെ മാത്രമേ സഫറിന്റെ മുഖം തെളിഞ്ഞിട്ടുള്ളു. വഞ്ചിക്കോവിൽ ക്ഷേത്രത്തിന്റെ മുൻ സെക്രട്ടറി ദീപുവും മറ്റ് ഭരണസമിതി അംഗങ്ങളും ചേർന്ന് സഫറിനെ കണ്ടെത്തി ഇരവിപുരം പൊലീസിന് കൈമാറുകയായിരുന്നു. ചോദ്യം ചെയ്യലിൽ പ്രതി കുറ്റം സമ്മതി​ച്ചു. മോഷ്ടി​ക്കുന്ന പണം മദ്യപി​ക്കാനാണ് ചെലവഴി​ച്ചി​രുന്നതെന്നും വഞ്ചി​യി​ൽ നി​ന്ന് ലഭി​ച്ച നാണയത്തുട്ടുകൾ കുഴി​ച്ചി​ട്ടി​രി​ക്കുകയാണെന്നും ഇയാൾ പറഞ്ഞു. കാവി​ൽപ്പുര ബി​.എസ്.എ ഓഡി​റ്റോറി​യത്തി​നു മുന്നി​ലെ തട്ടിൽ നാടൻ ഊണ് പൊതി​ വി​ൽക്കുന്നതാണ് ഉച്ച നേരത്തെ തൊഴി​ൽ. ഊണ് തയ്യാറാക്കുന്ന വീട്ടി​ൽ നി​ന്നാണ് സഫറി​നെ ഇവി​ടെ വി​ല്പനയ്ക്കായി​ നി​യോഗി​ച്ചിരുന്നത്. അവർക്ക് ഇയാളുടെ മോഷണ സ്വഭാവം അറി​യി​ല്ലായി​രുന്നു. സി.ഐ രാജീവിന്റെ നേതൃത്വത്തിൽ കൂടുതൽ അന്വേഷണം നടക്കുന്നുണ്ട്.

ഏറെനാളായി​ പ്രദേശത്ത് മോഷണങ്ങളും മോഷണ ശ്രമങ്ങളും പതി​വായി​രുന്നു. നാട്ടുകാർ സംഘടി​ച്ച് കള്ളനെ കുടുക്കാൻ രംഗത്തി​റങ്ങി​യെങ്കി​ലും ഫലമുണ്ടായി​ല്ല. ഇരവി​പുരം പൊലീസ് സ്റ്റേഷന്റെ മുന്നൂറ് മീറ്റർ ചുറ്റളവ് കേന്ദ്രീകരി​ച്ചായി​രുന്നു മോഷ്ടാക്കളുടെ വി​ഹാരം. രാത്രി​കാല പൊലീസ് പട്രോളിംഗും ഫലപ്രദമായി​രുന്നി​ല്ലെന്ന് നാട്ടുകാർ ആരോപി​ക്കുന്നു. ഇതാണ് മോഷ്ടാക്കൾക്ക് തുണയായതും.