പടിഞ്ഞാറെ കല്ലട : ഭരണിക്കാവ് ജംഗ്ഷനിൽ ഏർപ്പെടുത്തിയ ട്രാഫിക് പരിഷ്കാരം ഏതാനും വ്യാപാരി വ്യവസായികളുടെ സമ്മർദ്ദത്തെ തുടർന്ന് അട്ടിമറിച്ചതായി റിപ്പോർട്ട്. ജംഗ്ഷനിലെ ഗതാഗതക്കുരുക്ക് പരിഹരിക്കുന്നതിന്റെ ഭാഗമായി, കഴിഞ്ഞയാഴ്ച കോവൂർ കുഞ്ഞുമോൻ എം.എൽ.എയുടെ അദ്ധ്യക്ഷതയിൽ ചേർന്ന താലൂക്ക് വികസന സമിതി യോഗത്തിലാണ് ഈ സുപ്രധാന ട്രാഫിക് പരിഷ്കാരം ആഗസ്റ്റ് 1 മുതൽ നിലവിൽ വന്നത്.

ബസ് സ്റ്റോപ്പ് മാറ്റം അട്ടിമറിക്കപ്പെട്ടു

തീരുമാനം അനുസരിച്ച്, ജംഗ്ഷനിലെ ബസ്റ്റോപ്പുകൾ സമീപത്തുള്ള പഞ്ചായത്ത് വക ബസ് സ്റ്റാൻഡിലേക്ക് മാറ്റിയിരുന്നു. ആഗസ്റ്റ് 1 മുതൽ കെ.എസ്.ആർ.ടി.സി, പ്രൈവറ്റ് ബസുകൾ എല്ലാം പഞ്ചായത്ത് വക ബസ് സ്റ്റാൻഡിൽ പ്രവേശിച്ചുവേണം സർവീസ് നടത്തുവാൻ എന്നായിരുന്നു നിശ്ചയിച്ചിരുന്നത്. പൊലീസ്, മോട്ടോർ വാഹന വകുപ്പ് ഉദ്യോഗസ്ഥരുടെ മേൽനോട്ടത്തിൽ ഈ പരിഷ്കാരം നടപ്പിലാക്കുകയും ചെയ്തിരുന്നു.

ലക്ഷങ്ങൾ ചെലവാക്കിയ ബസ് സ്റ്റാൻഡ്

ഏതാനും ചില വ്യാപാരി വ്യവസായികളുടെ സമ്മർദ്ദത്തെ തുടർന്നാണ് ട്രാഫിക് പരിഷ്കാരം അട്ടിമറിച്ചത്. ഇതോടെ ലക്ഷങ്ങളോളം രൂപ ചെലവഴിച്ച് നിർമ്മിച്ച പഞ്ചായത്ത് വക ബസ് സ്റ്റാൻഡ് മന്ദിരം അനാഥമായിരിക്കുകയാണ്. ഈ നടപടി പൊതുജനങ്ങളുടെയും മറ്റ് വ്യാപാരികളുടെയും ഇടയിൽ വ്യാപകമായ പ്രതിഷേധത്തിന് ഇടയാക്കിയിട്ടുണ്ട്.