കുന്നത്തൂർ:മദ്യം നൽകാത്ത വിരോധത്തിൽ വൃദ്ധനെ കുത്തിപ്പരിക്കേൽപ്പിച്ച കേസിലെ പ്രതിയെ പൊലീസ് അറസ്റ്റ് ചെയ്തു. പോരുവഴി അമ്പലത്തുംഭാഗം തുളിക്കൽ പുത്തൻ വീട്ടിൽ അനിൽകുമാർ ആണ് പിടിയിലായത്. അമ്പലത്തുംഭാഗം വള്ളിത്തുണ്ടിൽ വീട്ടിൽ രമണനാണ് (68) ആക്രമണത്തിൽ ഗുരുതരമായി പരിക്കേറ്റത്.

കഴിഞ്ഞ ദിവസം ഉച്ചയ്ക്ക് 2 മണിയോടെയാണ് സംഭവം. രമണന്റെ സുഹൃത്ത് അനിൽകുമാറിന് മദ്യം കൊടുക്കാതിരുന്നത് രമണൻ പറഞ്ഞിട്ടാണെന്ന മുൻവൈരാഗ്യമാണ് ആക്രമണത്തിന് കാരണം.

ഭാര്യയെ റോഡിൽ നിന്നും വീട്ടിലേക്ക് കൂട്ടിക്കൊണ്ട് വരുന്ന സമയം പ്രതി രമണനെ കൊലപ്പെടുത്തുമെന്ന് ഭീഷണിപ്പെടുത്തുകയും അരയിൽ കരുതിയിരുന്ന കഠാര കൊണ്ട് നെഞ്ചിൽ കുത്തുകയുമായിരുന്നു. നെഞ്ചിൽ നിന്ന് കഠാര ഊരിയെടുത്ത് പുറത്തും മറ്റ് ഭാഗങ്ങളിലും വീണ്ടും കുത്തിപ്പരിക്കേൽപ്പിച്ചു. കഠാര ആക്രമണത്തിൽ ഇടത് നെഞ്ചിൽ ആഴത്തിൽ മുറിവേറ്റ രമണൻ ചികിത്സയിൽ തുടരുകയാണ്.ശൂരനാട് എസ്.എച്ച്.ഒ. ജോസഫ് ലിയോണിന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.