പത്തനാപുരം: കൊല്ലം-തിരുമംഗലം ദേശീയപാതയിൽ നിന്ന് ആരംഭിക്കുന്ന കുന്നിക്കോട്-പട്ടാഴി ഗ്രാമീണ പാതയോരത്ത് റെയിൽവേ ട്രാക്ക് കടന്നുപോകുന്ന ഭാഗത്ത് സംരക്ഷണ ഭിത്തിയില്ലാത്തത് വലിയ അപകട ഭീഷണിയാകുന്നു. വാഹനയാത്രക്കാരും കാൽനടയാത്രക്കാരും ഭീതിയോടെയാണ് ഈ ഭാഗത്തുകൂടി കടന്നുപോകുന്നത്. ആവണീശ്വരം റെയിൽവേ ക്രോസിന് സമീപം ഏകദേശം 50 മീറ്റർ ദൂരത്തിലാണ് ഈ അപകടാവസ്ഥ നിലനിൽക്കുന്നത്.

അപകട സാദ്ധ്യതയേറെ

കൊല്ലം-കൊട്ടാരക്കര-ആവണീശ്വരം-തിരുനെൽവേലി റെയിൽവേ പാതയുടെ 5 മീറ്റർ മാത്രം അടുത്താണ് റോഡുള്ളത്. പാതയോരത്തെ മണ്ണ് ഏതുസമയത്തും ഇടിഞ്ഞ് റെയിൽവേ ട്രാക്കിലേക്ക് വീഴാവുന്ന അവസ്ഥയിലാണ്. ട്രെയിൻ കടന്നുപോകുമ്പോൾ ഉണ്ടാകുന്ന കമ്പനം ഈ അപകടസാദ്ധ്യത വർദ്ധിപ്പിക്കുന്നുണ്ട്. ഈ ഭാഗത്ത് ഒരു പാർശ്വഭിത്തിയും അതിനുമുകളിൽ ക്രാഷ് ബാരിയറും നിർമ്മിക്കണമെന്നാണ് നാട്ടുകാരുടെ പ്രധാന ആവശ്യം.

നിവേദനം നൽകിയിട്ടും നടപടിയില്ല

• കഴിഞ്ഞ വർഷം മുഖ്യമന്ത്രിയുടെ നവകേരള സദസിൽ വാർഡ് അംഗം അനിൽകുമാറിന്റെ നേതൃത്വത്തിൽ നാട്ടുകാർ സംരക്ഷണ ഭിത്തി നിർമ്മിക്കണമെന്നാവശ്യപ്പെട്ട് നിവേദനം നൽകിയിരുന്നു.
• ഉദ്യോഗസ്ഥർ സ്ഥലത്തെത്തി പരിശോധന നടത്തുകയും ഉചിതമായ നടപടി സ്വീകരിക്കാമെന്ന് ഉറപ്പും നൽകി. എന്നാൽ, നാളിതുവരെയായിട്ടും തുടർനടപടികളൊന്നും ഉണ്ടായിട്ടില്ല.
• ഈ റോഡ് തലവൂർ, പട്ടാഴി, കലയപുരം തുടങ്ങിയ സ്ഥലങ്ങളിലെ സ്കൂളുകളിലേക്ക് വിദ്യാർത്ഥികൾ ഉൾപ്പെടെ നിരവധി പേർ ദിവസവും യാത്ര ചെയ്യുന്ന പ്രധാന പാതയാണ്.
• താലൂക്ക് സഭയിൽ വെച്ച് മന്ത്രി കെ.ബി. ഗണേഷ്കുമാറിന്റെ ശ്രദ്ധയിൽ വിഷയം കൊണ്ടുവന്നിട്ടും ഇതുവരെ പരിഹാരമുണ്ടായിട്ടില്ല.
• അടിയന്തരമായി സംരക്ഷണ ഭിത്തി നിർമ്മിച്ച് അപകടം ഒഴിവാക്കാനുള്ള നടപടികൾ സ്വീകരിക്കണമെന്നാണ് നാട്ടുകാരുടെ ആവശ്യം.