കൊല്ലം: കൊല്ലം- പരവൂർ തീരദേശ റോഡിൽ മുണ്ടയ്ക്കൽ പാപനാശനം മുതൽ ഇരവിപുരം വരെ പൊട്ടി​പ്പൊളി​ഞ്ഞ് കി​ടക്കാൻ തുടങ്ങി​യി​ട്ട് നാളേറെ ആയെങ്കി​ലും അറ്റകുറ്റപ്പണി നീളുന്നു.

കൊല്ലത്തു നിന്ന് പരവൂർ, വർക്കല എന്നിവിടങ്ങളിലേക്ക് ഗതാഗത കുരുക്കിൽപ്പെടാതെ എത്താൻ കഴിയുന്ന റോഡാണിത്. തകർന്ന റോഡിൽ നിന്ന് കല്ലുകളും മെറ്റിൽ കഷ്ണങ്ങളും ഇളകി ചിതറിക്കിടക്കുന്നു. കാൽനട യാത്ര പോലും ഈ ഭാഗത്ത് ദുസഹം. ഇരവിപുരം, താന്നി, മുക്കം, മയ്യനാട് എന്നി​വി​ടങ്ങളി​ലേക്ക് ഇതുവഴി അഞ്ച് സ്വകാര്യ ബസുകളാണ് സർവ്വീസ് നടത്തുന്നത്. ബസുകൾ വരുമ്പോൾ മറ്റൊരു വാഹനത്തിന് വശം കൊടുക്കാൻ കഴി​യാത്ത സാഹചര്യമാണ്. ടാറില്ലാത്തതിനാൽ റോഡിൽ പൊടിശല്യവും രൂക്ഷമാണ്.

മഴ പെയാൽ റോഡ‌് ചെളിക്കുണ്ടാകും.

ഇളകിമാറി കിടക്കുന്ന കല്ലുകളിൽ കയറി​ ഇരുചക്ര വാഹനങ്ങൾ അപകടത്തിൽപ്പെടുന്നതും പതിവാണ്. തീരദേശറോഡ് വഴി അരമണിക്കൂർ നേരത്തെ പരവൂരി​ൽ എത്താൻ കഴിയുമായി​രുന്നു. എന്നാൽ റോഡിന്റെ ശോചനീയാവസ്ഥ കാരണം കൊല്ലത്തു നിന്ന് പരവൂരിലേക്ക് ചാത്തന്നൂർ തിരുമുക്കിലെത്തിയാണ് പോകുന്നത്.

നടപ്പാത ഉണ്ടാവും

സംരക്ഷണ ഭിത്തി നിർമ്മിച്ച് റോഡ് വീതി കൂട്ടുന്ന പ്രവർത്തനങ്ങൾ ഭാഗി​കമായി​ നടക്കുന്നുണ്ട്. നടപ്പാത ഉൾപ്പെടെയാവും റോഡ് നി​ർമ്മാണം. തീരത്തിന്റെ ബലപ്പെടുത്തൽ പൂർത്തിയാകുന്നതോടെ ടാറിംഗ് ആരംഭിക്കുമെന്ന് അധികൃതർ അറിയിച്ചു. ഹാർബർ എൻജിനീയറിംഗ് വിഭാഗത്തിനാണ് നിർമ്മാണ ചുമതല.

സംരക്ഷണ ഭിത്തി കെട്ടി ബലപ്പെടുത്തൽ ജോലികൾ പുരോഗമിക്കുകയാണ്. അതിന് ശേഷം ടാറിംഗ് നടത്തുമെന്നാണ് അറിയാൻ കഴിഞ്ഞത്

കുരുവിള ജോസഫ്, കൗൺസിലർ, മുണ്ടയ്ക്കൽ