ശാസ്താംകോട്ട: കൊല്ലം-തേനി ദേശീയപാതയിൽ കടപുഴ ജംഗ്ഷനിൽ റോഡിലേക്ക് കാടുകൾ വളർന്നിറങ്ങിയത് വലിയ അപകട ഭീഷണിയാകുന്നു. വാഹനങ്ങൾക്കും കാൽനടയാത്രക്കാർക്കും ഒരുപോലെ ഇത് വലിയ പ്രശ്നമായിരിക്കുകയാണ്.

കാഴ്ച മറച്ച് കാടുകൾ

• കൊടുംവളവുള്ള ഈ ഭാഗത്ത് റോഡിന്റെ ഇരുവശത്തും കാടുകൾ വളർന്നുനിൽക്കുന്നത് കാരണം എതിർദിശയിൽ നിന്ന് വരുന്ന വാഹനങ്ങൾ കാണാൻ കഴിയുന്നില്ല.
• കാൽനടയാത്രക്കാർക്ക് പോലും നടപ്പാത ഉപയോഗിക്കാൻ കഴിയാത്ത സ്ഥിതിയാണ്.
• അപകടസൂചന നൽകേണ്ട സ്ഥലനാമ സൂചിക ബോർഡ് പോലും കാടുകൾ മറച്ചു.
• കൂടാതെ, വാഹനം തട്ടി ഇളകിക്കിടക്കുന്ന ബോർഡും അപകടസാദ്ധ്യത വർദ്ധിപ്പിക്കുന്നു.

അധികൃതരുടെ അനാസ്ഥ

ദിവസവും നൂറുകണക്കിന് വാഹനങ്ങൾ കടന്നുപോകുന്ന ഈ ദേശീയപാതയിൽ അപകടസാദ്ധ്യത വർദ്ധിച്ചിട്ടും കാടുകൾ നീക്കം ചെയ്യാൻ അധികൃതർ തയ്യാറാകാത്തതിൽ വ്യാപകമായ പ്രതിഷേധമുണ്ട്. ഈ ഭാഗങ്ങളിൽ മാലിന്യം തള്ളുന്നതും പതിവാണ്. എത്രയും വേഗം കാടുകൾ വെട്ടിമാറ്റി റോഡിലെ ഗതാഗതം സുരക്ഷിതമാക്കണമെന്നാണ് പ്രദേശവാസികളുടെ ആവശ്യം.