സ്വസ്ഥത കെട്ട് ക്യു.എ.സി റോഡ്

കൊല്ലം: കൊല്ലം ക്യു.എ.സി റോഡിൽ ബൈക്കി​ലെ അഭ്യാസി​കൾ സൃഷ്ടി​ക്കുന്ന ഭീതി​കാരണം നടന്നുപോകാനാവാത്ത അവസ്ഥ. കഷ്ടിച്ച് നാനൂറ് മീറ്റർ മാത്രം നീളമുള്ള റോഡിൽ, രൂപമാറ്റം വരുത്തിയ ബൈക്കുകൾക്ക് പുറമേ ആഡംബര കാറുകളിലും ഉഗ്ര ശബ്ദം പുറപ്പെടുവിച്ച് ഫ്രീക്കന്മാർ തലങ്ങും വി​ലങ്ങും പാഞ്ഞി​ട്ടും പൊലീസോ മോട്ടോർ വാഹന വകുപ്പോ ഇടപെടുന്നി​ല്ല.

കോളേജി​ലേക്ക് വിദ്യാർത്ഥിനികൾ വരുമ്പോഴും പോകുമ്പോഴും ഇവരുടെ ശ്രദ്ധ നേടാനാണ് ഈ പരാക്രമങ്ങൾ അധി​കവും. രാത്രി​യി​ലുമുണ്ട് അഭ്യാസങ്ങൾ. ദൂരെ സ്ഥലങ്ങളിൽ നിന്നുള്ള ചെറുപ്പക്കാർ പോലും കാറി​ലും ബൈക്കി​ലും ചീറിപ്പായാൻ ഇവിടെ എത്താറുണ്ട്. ഇതി​നി​ടെ റീൽസ് ചിത്രീകരണവുമുണ്ട്. പ്രദേശവാസികൾ ഫോട്ടോയും വീഡിയോയും സഹിതം പൊലീസിനും മോട്ടോർ വാഹന വകുപ്പിനും പരാതി നൽകിയിട്ടും തിരിഞ്ഞുനോക്കുന്നില്ലെന്നും ആരോപണമുണ്ട്. കൊല്ലം റെയിൽവേ സ്റ്റേഷനിലേക്ക് അടക്കമുള്ള നൂറുകണക്കി​ന് ആൾക്കാർ ആശ്രയി​ക്കുന്ന റോഡാണി​ത്.

നഗരഹൃദയത്തിലെ ഏറ്റവും ശാന്തമായ പാതകളിലൊന്നായിരുന്നു ക്യു.എ.സി റോഡ്. ചിന്നക്കടയിലെ ഗതാഗതക്കുരുക്ക് കുറയ്ക്കാൻ സ്വകാര്യ ബസുകൾ കമ്മിഷണർ ഓഫീസ് ആർ.ഒ.ബിയി​ലൂടെ ആക്കി​യതി​നാൽ റെയിൽവേ സ്റ്റേഷനിലേക്ക് പോകുന്നത് ക്യു.എ.സി റോഡ് വഴിയാണ്. സമയം ലാഭിക്കാൻ ബസുകൾ മിന്നൽ വേഗത്തിലാണ് ഇതുവഴി പോകുന്നത്. അതിനിടയിലാണ് ഫ്രീക്കന്മാരുടെ ശല്യം.

പിഴയുണ്ട്, പരിശോധനയില്ല

 വാഹനത്തിലെ ഓരോ രൂപമാറ്റത്തിനും പിഴ കനക്കും

 സൈലൻസർ മാറ്റിയാൽ 5000 രൂപ പിഴ

 അതേ ബൈക്കിന്റെ ഹെഡ്‌ലൈറ്റിൽ രൂപം മാറ്റിയാൽ 5000 രൂപ പിഴ

 ഹാൻഡിൽ ബാർ മാറ്റിയാൽ വീണ്ടും കിട്ടും 5000 പിഴ

 ഇതേ ബൈക്കിന്റെ നമ്പർ പ്ലേറ്റും മാറ്റിയാൽ പിഴ 3000 വേറെ

 ഈ ബൈക്കിനു പൊല്യൂഷൻ സർട്ടിഫിക്കറ്റ് ഇല്ലെങ്കിൽ പിഴ 2000 രൂപ

 എല്ലാംകൂടി ഒരുമിച്ചാകുമ്പോൾ 20,000 രൂപ