കൊല്ലം: വിശിഷ്ട സേവനത്തിനുള്ള ഈ വർഷത്തെ മുഖ്യമന്ത്രിയുടെ എക്സൈസ് മെഡലിന് ജില്ലയിൽ നിന്ന് നാല് ഉദ്യോഗസ്ഥർ അർഹരായി. കൊല്ലം എക്സൈസ് എൻഫോഴ്സ്മെന്റ് ആൻഡ് ആന്റി നർകോട്ടിക് സ്പെഷ്യൽ സ്‌ക്വാഡിലെ എക്സൈസ് ഇൻസ്പെക്ടർ സി.പി.ദിലീപ്, സിവിൽ എക്സൈസ് ഓഫീസർമാരായ ബി.എസ്.അജിത്ത്, എം.ആർ.അനീഷ്, വനിത സിവിൽ എക്സൈസ് ഓഫീസർ ജി.ഗംഗ എന്നിവരാണ് മുഖ്യമന്ത്രിയുടെ എക്സൈസ് മെഡലിന് അർഹരായത്. കഴിഞ്ഞ ഒരുവർഷത്തിനിടയിൽ 200 കിലോയിൽ അധികം കഞ്ചാവ്, അര കിലോയിലധികം എം.ഡി.എം.എ, എൽ.എസ്.ഡി സ്റ്റാമ്പുകൾ, ഹാഷിഷ് ഓയിൽ, ബ്രൗൺഷുഗർ, ഹെറോയിൻ തുടങ്ങി വലിയ അളവിലുള്ള മയക്കുമരുന്ന് കേസുകൾ കണ്ടുപിടിച്ച് ജില്ലയിലെ പ്രധാന മയക്കുമരുന്ന് വിപണനക്കാരെയും പിടികൂടിയതിനാണ് അംഗീകാരം. സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ എസ്.എസ്.ഷിജുവിന്റെ നേതൃത്വത്തിലാണ് കൊല്ലം സ്പെഷ്യൽ സ്‌ക്വാഡ് കേസുകൾ കണ്ടെത്തിയത്.