ചവറ : പന്മന, പോരൂക്കരയിൽ ,വട്ടക്കായൽ ടൂറിസത്തിന്റെ അനന്തസാദ്ധ്യതകളുമായി സഞ്ചാരികളെ കാത്തിരിക്കുകയാണ്. അധികൃതർ ഒന്നു മനസുവെച്ചാൽ ഈ കായൽ നാടിന് ഏറെ പ്രയോജനം ചെയ്യും. വട്ടക്കായലിനെ ടൂറിസം കേന്ദ്രമാക്കി മാറ്റിയാൽ പന്മന പഞ്ചായത്തിന് വലിയ വരുമാനം നേടാനാകും. 2017-ലാണ് വട്ടക്കായൽ തീരത്ത് പരിസ്ഥിതി സൗഹൃദ ടൂറിസം പദ്ധതി എന്ന ആശയം ഉടലെടുത്തത്. ഇതിനായി ലക്ഷങ്ങൾ മുടക്കി ബോട്ടുകൾ അടുപ്പിക്കാനുള്ള ജെട്ടിയും ഹൈമാസ് ലൈറ്റുകളും സ്ഥാപിച്ചു. എന്നാൽ പിന്നീട് സാങ്കേതിക കാരണങ്ങളാൽ പദ്ധതി നിലച്ചു.

നിലവിലെ അവസ്ഥ

• ദേശീയപാതയിൽനിന്ന് പടിഞ്ഞാറോട്ട് സഞ്ചരിച്ചാൽ വട്ടക്കായലിന്റെ തീരത്തെത്താം.
• ടൂറിസം മാപ്പിൽ ഇടംപിടിച്ചതിനാൽ അപൂർവമായി വിദേശികൾ ഇവിടെയെത്താറുണ്ട്.
• ബോട്ടുകൾ അടുക്കാനുള്ള സൗകര്യങ്ങളും കായൽ സൗന്ദര്യം ആസ്വദിക്കാൻ കായൽപ്പാലവും സുരക്ഷിതമായ വേലികളും നിലവിലുണ്ട്.
• എന്നാൽ, ബോട്ടുകൾ അടുപ്പിക്കാൻ കഴിയാത്തവിധം കായലിന് ആഴമില്ലാത്തതാണ് പ്രധാന പ്രശ്നം.
• ഇൻലാൻഡ് നാവിഗേഷന്റെ സഹായത്തോടെ 20 മീറ്റർ ആഴത്തിൽ ഖനനം ചെയ്യണമെന്ന ആവശ്യം ഉയരുന്നുണ്ട്.

വികസന സാദ്ധ്യതകൾ

• വട്ടക്കായലിൽ ടൂറിസം വികസിപ്പിച്ചാൽ, ഇവിടെയെത്തുന്ന സഞ്ചാരികൾക്ക് പന്മന ആശ്രമം, പൊന്മന കാട്ടിൽമേക്കതിൽ ദേവീക്ഷേത്രം, മാതാ അമൃതാനന്ദമയി മഠം തുടങ്ങിയ സമീപപ്രദേശങ്ങളും സന്ദർശിക്കാൻ കഴിയും.

• നിർമ്മാണം പൂർത്തിയായാൽ 15 കിലോമീറ്ററോളം ദൂരം കായലിലൂടെ ജലയാത്ര നടത്താൻ സാധിക്കും.

• ഒരു സീപോർട്ട് ആവാനുള്ള സാദ്ധ്യതയും ഈ പ്രദേശത്തിനുണ്ട്.