പുനലൂർ: 19 വർഷം മുമ്പ് തറക്കല്ലിട്ട പുനലൂർ നഗരസഭയുടെ ടൗൺ ഹാൾ നിർമ്മാണം ഇപ്പോഴും പൂർത്തിയാവാതെ അനിശ്ചിതത്വത്തിൽ. പലതവണ നിർമ്മാണോദ്ഘാടനം നടത്തിയിട്ടും കെട്ടിടത്തിന്റെ പണി മുന്നോട്ട് പോകാത്തത് വലിയ വിമർശനങ്ങൾക്ക് ഇടയാക്കിയിട്ടുണ്ട്. ഒന്നാം കേരള നിയമസഭാംഗവും സി.പി.ഐ നേതാവുമായിരുന്ന അഡ്വ. എൻ. രാജഗോപാലൻ നായരുടെ പേരിലുള്ളതാണ് ഈ ടൗൺ ഹാൾ. വർഷങ്ങളായി എൽ.ഡി.എഫ് ഭരിക്കുന്ന നഗരസഭയിൽ സി.പി.ഐക്ക് നഗരസഭാദ്ധ്യക്ഷൻ, ഉപാദ്ധ്യക്ഷൻ പദവികൾ ഉണ്ടായിട്ടും പദ്ധതി അനിശ്ചിതത്തിൽ തുടരുകയാണ്. ചലച്ചിത്ര വികസന കോർപ്പറേഷനുമായി സഹകരിച്ച് കിഫ്ബി സഹായത്തോടെ ടൗൺ ഹാളും തിയേറ്റർ സമുച്ചയവും നിർമ്മിക്കാൻ മുൻപ് പദ്ധതിയിട്ടെങ്കിലും സാങ്കേതിക തടസങ്ങൾ കാരണം ഉപേക്ഷിക്കേണ്ടിവന്നു.

പദ്ധതി ചരിത്രം

• 2006-ലാണ് ടൗൺ ഹാളിന്റെ നിർമ്മാണത്തിന് ആദ്യമായി തറക്കല്ലിട്ടത്.
• പിന്നീട് രണ്ട് തവണ കൂടി ഉദ്ഘാടനച്ചടങ്ങുകൾ നടന്നു.
• കൊല്ലം-തിരുമംഗലം ദേശീയപാതയിൽ നഗരസഭാ മൈതാനത്തിന് സമീപമാണ് ടൗൺ ഹാൾ നിർമ്മിക്കാൻ ഉദ്ദേശിച്ചത്.
• ഒരേസമയം 800 പേർക്ക് ഇരിക്കാവുന്ന നിലയിൽ 16 കടമുറികളുള്ള വ്യാപാരസമുച്ചയം ഉൾപ്പെടെ മൂന്ന് നിലകളിലായി 4020 ചതുരശ്ര മീറ്റർ വിസ്തൃതിയിലാണ് കെട്ടിടം രൂപകൽപ്പന ചെയ്തത്.
• 2022-ൽ നഗരസഭയുടെ പദ്ധതി വിഹിതത്തിൽ നിന്ന് 1.60 കോടി രൂപ ചെലവഴിച്ച് കെട്ടിടത്തിന്റെ അടിസ്ഥാനം നിർമ്മിച്ചു.
• എന്നാൽ അതിനുശേഷം പണി നിലച്ചു.
• ഇപ്പോൾ നിർമ്മാണസ്ഥലം കാടുകയറി ഇഴജന്തുക്കളുടെ താവളമായി മാറിയിരിക്കുകയാണ്.
• 9.95 കോടി രൂപ പ്രതീക്ഷിച്ച പദ്ധതിയുടെ ചെലവ്, സമയബന്ധിതമായി പൂർത്തിയാകാത്തതിനാൽ ഇനിയും വർദ്ധിക്കുമെന്നാണ് വിലയിരുത്തൽ.

ഇനി അർബൻ ആൻഡ് റൂറൽ ഡെവലപ്മെന്റ് ഫിനാൻസ് കോർപ്പറേഷനി ൽ നിന്ന് വായ്പ എടുത്തു വേണം നിർമ്മാണം പുനരാരംഭിക്കാൻ. വായ്പയുമായി ബന്ധപ്പെട്ട രേഖകൾ കെ.യു.ആർ.ഡി.എഫ്.സിയ്ക്ക് കൈമാറിയിട്ടുണ്ട്. വായ്പ ഉടൻ ശരിയാവും. ടൗൺ ഹാൾ യാഥാർത്ഥ്യമാകും.

വി.പി. ഉണ്ണികൃഷ്ണൻ

(സി.പി.ഐ മണ്ഡലം സെക്രട്ടറിയും

നഗരസഭ കൗൺസിലറുമാണ്)