കൊല്ലം: കൊട്ടാരക്കര ആനയത്ത് റോഡ് സൈഡിൽ നിന്നയാളെ പൊട്ടിയ കുപ്പികൊണ്ട് കുത്തിക്കൊലപ്പെടുത്താൻ ശ്രമിച്ച പ്രതി അറസ്റ്റിൽ. പുനലൂർ ഈട്ടിവിള വീട്ടിൽ രാജനെയാണ് (59) കൊട്ടാരക്കര പൊലീസ് അറസ്റ്റ് ചെയ്തത്. ആനയം മൈലക്കുഴി പുത്തൻവീട്ടിൽ ഗുരുകുമാരൻ തമ്പിക്കാണ് (46) കുത്തേറ്റത്. വയറിന് മുകളിലും തോളിലും കുത്തേറ്റ ഇയാൾ പാരിപ്പള്ളി ഗവ. മെഡിക്കൽ കോളേജ് ആശുപത്രിയിൽ ചികിത്സയിലാണ്. ഞായറാഴ്ച രാത്രി 9ന് ആനയം മന്ദിരം ജംഗ്ഷനിലായിരുന്നു സംഭവം.

ആനയത്ത് അടുത്തകാലത്തായി താമസിച്ചുവരികയായിരുന്നു രാജൻ. മദ്യലഹരിയിൽ മന്ദിരം ജംഗ്ഷനിൽ നിന്നിരുന്ന ഗുരുകുമാരൻ തമ്പി അസഭ്യം പറഞ്ഞതുമായി ബന്ധപ്പെട്ടാണ് വാക്കേറ്റമുണ്ടായതും കുപ്പികൊണ്ട് കുത്തിയതും. കുത്തിപ്പരിക്കേൽപ്പിച്ച ശേഷം രാജൻ ഓടി രക്ഷപെട്ടു. ഇന്നലെ രാത്രിയോടെ കൊട്ടാരക്കരയിലെ ബാറിൽ മദ്യപിക്കാനെത്തിയപ്പോഴാണ് അറസ്റ്റ് ചെയ്തത്.