കരുനാഗപ്പള്ളി: കരുനാഗപ്പള്ളി റെയിൽവേ സ്റ്റേഷന്റെ സമഗ്ര നവീകരണത്തിനായി റെയിൽവേ മന്ത്രാലയം 6 കോടി രൂപ അനുവദിച്ചതായി കെ.സി. വേണുഗോപാൽ എം.പി അറിയിച്ചു. സ്റ്റേഷന്റെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനാണ് ഈ തുക വിനിയോഗിക്കുക. അടുത്ത രണ്ടര മാസത്തിനുള്ളിൽ ടെണ്ടർ നടപടികൾ ആരംഭിക്കും. നേരത്തെ, സ്റ്റേഷന്റെ പാർക്കിംഗ് ഏരിയയുടെയും അപ്പ്രോച്ച് റോഡിന്റെയും നിർമ്മാണം പൂർത്തിയായിരുന്നു. കൂടാതെ, ഇടക്കുളങ്ങര പുള്ളിമാൻ ജംഗ്ഷൻ ലെവൽ ക്രോസിൽ അടിപ്പാത നിർമ്മിക്കാൻ റെയിൽവേ നേരത്തെ തുക അനുവദിച്ചിരുന്നു.

വികസന പദ്ധതികൾ

• പ്ലാറ്റ്‌ഫോം നവീകരണം: പ്ലാറ്റ്‌ഫോമുകളുടെ ഉയരം കൂട്ടി കോൺക്രീറ്റ് ചെയ്ത് ടൈലുകൾ സ്ഥാപിക്കും.

• യാത്രാ സൗകര്യങ്ങൾ: പ്ലാറ്റ്‌ഫോം ഷെൽട്ടറുകളുടെ നീളം കൂട്ടും, ശൗചാലയങ്ങൾ, വെയിറ്റിംഗ് മുറികൾ, കുടിവെള്ള സൗകര്യം എന്നിവ ഒരുക്കും.

• മറ്റ് നവീകരണങ്ങൾ: സ്റ്റേഷൻ കെട്ടിടങ്ങളുടെ നവീകരണം, കൂടുതൽ ഇരിപ്പിടങ്ങൾ, സർക്കുലേറ്റിംഗ് ഏരിയയുടെ വിസ്തൃതി വർദ്ധിപ്പിക്കൽ, ലൈറ്റിംഗ് അടക്കമുള്ള വൈദ്യുതീകരണ ജോലികൾ എന്നിവയും നടത്തും.

• പ്രത്യേക സൗകര്യങ്ങൾ: അംഗപരിമിതർക്കായി പ്രത്യേക സൗകര്യങ്ങൾ ഏർപ്പെടുത്തും.

• സുരക്ഷാ ക്രമീകരണങ്ങൾ: കാൽനടയാത്രക്കാരുടെ സുരക്ഷ ഉറപ്പാക്കാൻ ലിഫ്റ്റുകളും കൂടുതൽ ഫുട് ഓവർബ്രിഡ്ജുകളും സ്ഥാപിക്കാനുള്ള ഇടപെടലുകൾ നടത്തുമെന്നും എം.പി അറിയിച്ചു.

കൂടുതൽ ട്രെയിനുകൾക്ക് സ്റ്റോപ്പ് അനുവദിക്കാനും കൊവിഡ് കാലത്ത് നിറുത്തിയ സ്റ്റോപ്പുകൾ പുനരാരംഭിക്കാനും റെയിൽവേയിൽ സമ്മർദ്ദം ചെലുത്തും. രാജ്യറാണി, മംഗലാപുരം എക്സ്പ്രസ്, ചെന്നൈ മെയിൽ, മൈസൂരു-കൊച്ചുവേളി തുടങ്ങിയ ട്രെയിനുകൾക്ക് സ്റ്റോപ്പ് അനുവദിക്കുന്നതിനുള്ള ശ്രമങ്ങൾ തുടരും.

കെ.സി. വേണുഗോപാൽ എം.പി