തൃപ്രയാർ: ശ്രീരാമസ്വാമി ക്ഷേത്രത്തിൽ രാമായണ മാസാചരണത്തിന്റെ ഭാഗമായി മകളോടും സുഹൃത്തിനോടുമൊപ്പം ദർശനത്തിനെത്തിയ നാട്ടിക പഞ്ചായത്ത് അംഗവും ബി.ജെ.പി നാട്ടിക പഞ്ചായത്ത് കമ്മിറ്റി പ്രസിഡന്റുമായ പി.വി.സെന്തിൽകുമാറിനു നേരെ സെക്യൂരിറ്റിക്കാരന്റെ പരാക്രമം. സെന്തിലിനെ ക്ഷേത്രനടയിൽ അകാരണമായി പിടിച്ചുതള്ളുകയും കാണിക്ക അർപ്പിക്കാൻ സമ്മതിക്കാതെ കൈപിടിച്ച് തിരിക്കുകയും ചെയ്‌തെന്നാണ് പരാതി. സെക്യൂരിറ്റിയുടെ അതിക്രമത്തിൽ ബി.ജെ.പി നാട്ടിക മണ്ഡലം കമ്മിറ്റി ക്ഷേത്രനടയിൽ പ്രതിഷേധിച്ചു. ജില്ലാ സെക്രട്ടറി ഇ.പി.ഹരീഷ് ഉദ്ഘാടനം ചെയ്തു. ഭാരവാഹികളായ ഷൈൻ നെടിയിരിപ്പിൽ, ടി.ജി.രതീഷ്, ലാൽ ഊണുങ്ങൽ, എൻ.എസ്.ഉണ്ണിമോൻ, നവീൻ മേലെടത്ത്, പഞ്ചായത്ത് മെമ്പർ സുരേഷ് ഇയ്യാനി തുടങ്ങിയവർ നേതൃത്വം നൽകി.