തൃപ്രയാർ: ശ്രീരാമസ്വാമി ക്ഷേത്രത്തിൽ 1008 നാളികേരം കൊണ്ടുള്ള മഹാഗണപതി ഹോമവും ഗജപൂജയും ആനയൂട്ടും നടന്നു. രാവിലെ ആരംഭിച്ച മഹാഗണപതി ഹോമത്തിന് തന്ത്രി തരണനെല്ലൂർ പടിഞ്ഞാറെ മന അനിൽ പ്രകാശ് നമ്പൂതിരി മുഖ്യ കാർമ്മികത്വം വഹിച്ചു. ക്ഷേത്രത്തിലെ നിത്യ ശീവേലി ആന കൊടുങ്ങല്ലൂർ ദേവിദാസനെ ഗജപൂജ ചെയ്തു. തുടർന്ന് ആനയൂട്ടും നടത്തി. കൊച്ചിൻ ദേവസ്വം ബോർഡ് മെമ്പർ അഡ്വ. കെ.പി.അജയൻ, എറണാകുളം ശിവകുമാറിന് ആദ്യ ഉരുള നൽകി. അസിസ്റ്റന്റ് കമ്മിഷണർമാരായ എം.മനോജ് കുമാർ, കെ.കെ.കല, ഷീജ അനിൽകുമാർ, ദേവസ്വം മാനേജർ മനോജ് കെ.നായർ, സനാതന ധർമ്മ പാഠശാല പ്രസിഡന്റ് പി.മണികണ്ഠൻ, വി.ആർ.പ്രകാശൻ എന്നിവർ നേതൃത്വം നൽകി. ആനയൂട്ടിൽ 11 ആനകൾ പങ്കെടുത്തു. ആദ്യം നേദിച്ച ചോറുരുളയും തുടർന്ന് കരിമ്പ്, പഴം, കൈതച്ചക്ക, തണ്ണിമത്തൻ, കുക്കുമ്പർ, വെള്ളരിക്ക എന്നിവയും ആനകൾക്ക് നൽകി. നാലമ്പല തീർത്ഥാടനത്തോട് അനുബന്ധിച്ച് ക്ഷേത്രത്തിൽ വൻ തിരക്കായിരുന്നു.