ഇരിങ്ങാലക്കുട : ലഹരിമുക്ത ഇരിങ്ങാലക്കുടയ്ക്കായി ഈ വർഷത്തെ ഓണം 'മധുരം ജീവിതം' ലഹരിവിമുക്ത ഓണമായി ആഘോഷിക്കും. സമൂഹം നേരിടുന്ന ഏറ്റവും ആപത്കരവും മാരകവുമായ വിപത്തായ ലഹരിക്കെതിരെ ഇരിങ്ങാലക്കുടയിലെ ആബാലവൃദ്ധം ജനതയെ അണിനിരത്തിയാവും ഈ ഓണനാളുകളിൽ ഇരിങ്ങാലക്കുടയുടെ സ്വന്തം ഉത്സവമായ വർണക്കുടയുടെ സ്പെഷ്യൽ എഡിഷൻ അരങ്ങേറുകയെന്ന് മന്ത്രി ഡോ. ബിന്ദു പറഞ്ഞു. ഇരിങ്ങാലക്കുടയിൽ തുടക്കമിട്ട മധുരം ജീവിതം ലഹരിമുക്തി അവബോധ രൂപീകരണ പ്രവർത്തനങ്ങളുടെ തുടർച്ചയായാണ് 'മധുരം ജീവിതം' ലഹരിവിമുക്ത ഓണം. ഓണംകളി മത്സരം, ഇരിങ്ങാലക്കുട മണ്ഡലത്തിലെ സ്‌കൂൾ-കോളജ് വിദ്യാർത്ഥികൾക്കായി വിവിധ മത്സരങ്ങൾ, പൊതുജനങ്ങൾക്കും കുടുംബശ്രീ പോലുള്ള സംഘങ്ങൾക്കും ക്ലബ്ബുകൾക്കും വെവ്വേറെ മത്സരങ്ങൾ എന്നിവയോടെയാണ് ലഹരിമുക്ത ഇരിങ്ങാലക്കുടയ്ക്കായുള്ള 'മധുരം ജീവിതം' വർണക്കുട എഡിഷൻ ഒരുങ്ങുന്നത്. 31ന് പതിനായിരം ബോധവത്കരണ പൂക്കളങ്ങളുമായി 'പൂക്കാലം' പരിപാടി ഒരുക്കും. കലാ-സാംസ്‌കാരിക-ശാസ്ത്ര സംഘടനയായ 0480യുമായി സഹകരിച്ചാണ് ബ്ലൂം എഗൈൻസ്റ്റ് ഡ്രഗ്‌സ് എന്ന ആശയത്തെ മുൻനിറുത്തിയുള്ള ബോധവത്കരണ പൂക്കളങ്ങൾ ഒരുക്കൽ. സെപ്റ്റംബർ ഒന്നിന് ഇരിങ്ങാലക്കുട സെന്റ് ജോസഫ്‌സ് കോളേജിലായിരിക്കും രചനാമത്സരങ്ങൾ. സെപ്തംബർ രണ്ടിന് ഇരിങ്ങാലക്കുട ടൗൺ ഹാളിൽ നാടൻപാട്ട് മത്സരം അരങ്ങേറും. സെപ്തംബർ മൂന്നിന് പൊറത്തിശ്ശേരി കണ്ടാരംതറ മൈതാനത്ത് ഓണംകളി മത്സരം നടക്കും. സ്‌കൂൾ തലത്തിലും കോളജ് തലത്തിലും പ്രസംഗം, ചിത്രരചന, കഥാരചന, കവിതാരചന, ഉപന്യാസ രചനാ മത്സരങ്ങൾ നടക്കും. സ്‌കൂൾ-കോളേജ് തലങ്ങളിലെ മത്സരങ്ങളിൽനിന്നും തിരഞ്ഞെടുക്കപ്പെട്ടവരാണ് മണ്ഡലംതല മത്സരത്തിൽ മാറ്റുരയ്ക്കുക. സീനിയർ വിഭാഗക്കാർക്ക് രചനാ മത്സരങ്ങളിൽ നേരിട്ട് പങ്കെടുക്കാൻ അവസരം നൽകും.