വടക്കാഞ്ചേരി : ഓണത്തോട് അനുബന്ധിച്ച് വടക്കാഞ്ചേരി, അത്താണി നഗരങ്ങളിൽ ഇന്ന് മുതൽ സമഗ്ര ഗതാഗത പരിഷ്‌കാരം. ഷൊർണൂർ, ചേലക്കര ഭാഗത്തു നിന്നും വരുന്ന ചരക്ക് വാഹനങ്ങൾ മാരാത്തുകുന്ന് റോഡ് വഴി കടന്ന് പോകണം. മറ്റ് ചരക്ക് വാഹനങ്ങൾക്കും ടൗണിൽ പ്രവേശനമില്ല. നഗരത്തിൽ പാർക്കിംഗും നിരോധിച്ചു. കടകളിൽ നിന്ന് ഫുട്പാത്തിലേക്ക് ഇറക്കി കച്ചവടവും ഇരുചക്ര വാഹന പാർക്കിംഗും ഒഴിവാക്കാൻ നിർദ്ദേശം നൽകി. ബസുകൾ അംഗീകൃത സ്റ്റോപ്പുകളിൽ മാത്രം നിറുത്തണം. സെപ്തംബർ 10 വരെ ഗതാഗത പരിഷ്‌കാരം നീണ്ടുനിൽക്കും. യോഗത്തിൽ നഗരസഭാ ചെയർപേഴ്‌സൺ പി.എൻ.സുരേന്ദ്രൻ അദ്ധ്യക്ഷനായി. പി.ആർ.അരവിന്ദക്ഷൻ, എൻ.കെ.പ്രമോദ്കുമാർ, റിസ്മി മുഹമ്മദ് തുടങ്ങിയവർ പങ്കെടുത്തു.
ഗതാഗത ക്രമീകരണം ഇപ്രകാരം
തൃശൂരിൽ നിന്ന് വരുന്ന ബസുകൾ അത്താണി മേൽപ്പാലത്തിന് സമീപം നിറുത്തി യാത്രക്കാരെ ഇറക്കണം.
ഷൊർണൂർ-ചേലക്കര ബസുകൾ ഓട്ടുപാറ മൃഗാശുപത്രിക്ക് മുൻവശം നിറുത്തി സ്റ്റാൻഡിൽ കയറാതെ എതിർവശത്ത് നിറുത്തി വടക്കാഞ്ചേരി സ്റ്റാൻഡിൽ കയറി തൃശൂരിലേക്ക് പോകണം.
തൃശൂർ, ഷൊർണൂർ, ചേലക്കര ബസുകൾ വടക്കാഞ്ചേരി ഗോൾഡൻ ബേക്കറിക്ക് സമീപം, ബോയ്‌സ് എൽ.പി.സ്‌കൂളിന്റെ മുൻവശം എന്നിവിടങ്ങളിൽ നിറുത്തി ഓട്ടുപാറ സ്റ്റാൻഡിൽ കയറി, ടി.ബി റോഡ് സ്റ്റോപ്പിന് ഇടതുവശം നിറുത്തണം.
വടക്കാഞ്ചേരി സ്റ്റാൻഡിൽ നിന്നും പുറപ്പെടുന്ന കുന്നംകുളം-വരവൂർ ബസുകൾ ബോയ്‌സ് എൽ.പി സ്‌കൂൾ മുൻവശത്താണ് നിറുത്തേണ്ടത്. ഓട്ടുപാറ സ്റ്റാൻഡിൽ കയറി ബൈപാസ് വഴി കുന്നംകുളം റോഡിലേയ്ക്ക് പ്രവേശിക്കണം.
കേച്ചേരി, വടക്കാഞ്ചേരി ബസുകൾ ഗോൾഡൻ ബേക്കറിക്ക് സമീപം, ബോയ്‌സ് എൽ.പി.സ്‌കൂളിന് മുൻവശം നിറുത്തി ഓട്ടുപാറ ബസ് സ്റ്റാൻഡിൽ പ്രവേശിക്കണം.
വടക്കാഞ്ചേരി, കേച്ചേരി ബസുകൾ ഓട്ടുപാറ സ്റ്റാൻഡ്, വടക്കാഞ്ചേരി പൂരക്കമ്മിറ്റി ഓഫീസിന് എതിർവശത്ത് ബസ് സ്റ്റാൻഡിൽ കയറി പോകണം.
കുന്നംകുളം, വരവൂർ ബസുകൾ ഓട്ടുപാറ ബൈപാസ് റോഡിലേയ്ക്ക് പ്രവേശിക്കാതെ ഓട്ടുപാറ ജംഗ്ഷൻ വഴി സംസ്ഥാന പാതയിലേക്ക് പ്രവേശിച്ച് സ്റ്റാൻഡിന് എതിർവശം, പൂരക്കമ്മിറ്റി ഓഫീസിന് എതിർവശം നിറുത്തി വടക്കാഞ്ചേരി സ്റ്റാൻഡിൽ കയറണം.
