ആറ്റിങ്ങൽ: അവനവഞ്ചേരി,പാങ്ങോട് പോസ്റ്റ് ഓഫീസുകൾക്ക് ഈ സാമ്പത്തികവർഷം സ്വന്തം കെട്ടിടം നിർമ്മിക്കുമെന്ന് അടൂർ പ്രകാശ് എം.പിയുടെ ചോദ്യത്തിന് കേന്ദ്രമന്ത്രി ഡോ.പെമ്മസാനി ചന്ദ്രശേഖർ ലോക്‌സഭയിൽ നൽകിയ മറുപടിയിൽ വ്യക്തമാക്കി. ആറ്റിങ്ങൽ പാർലമെന്റ് മണ്ഡലത്തിലെ 9 പോസ്റ്റ് ഓഫീസുകൾക്ക് സ്വന്തമായി സ്ഥലമുണ്ടെങ്കിലും വാടക കെട്ടിടത്തിലാണ് പ്രവർത്തിക്കുന്നത്. ഇതിൽ രണ്ടു പോസ്റ്റ് ഓഫീസുകൾക്ക് ഈ വർഷം കെട്ടിടം നിർമിക്കുന്നതിനാണ് ഡിപ്പാർട്ട്മെന്റ് പരിഗണിക്കുന്നത്. രാജ്യത്താകെ 25, 096 പോസ്റ്റ് ഓഫീസുകളുള്ളതിൽ 4,499 പോസ്റ്റ് ഓഫീസുകൾ മാത്രമാണ് സ്വന്തം കെട്ടിടത്തിൽ പ്രവർത്തിക്കുന്നത്. ഈ സാമ്പത്തിക വർഷം 439 പോസ്റ്റ് ഓഫീസുകൾക്ക് സ്വന്തമായി കെട്ടിടം നിർമ്മിക്കുന്നതിനാണ് സർക്കാർ പദ്ധതി.