തിരുവനന്തപുരം: മന്ത്രി പി.എ.മുഹമ്മദ് റിയാസിനെ ഊഞ്ഞാലാട്ടി മന്ത്രി വി.ശിവൻകുട്ടി. ടൂറിസം ഡയറക്ടറേറ്റിൽ നടന്ന ഓണാഘോഷ ഫെസ്റ്റിവൽ ഓഫീസ് ഉദ്ഘാടന ചടങ്ങിലായിരുന്നു ഈ കൗതുകം. മന്ത്രി വി.ശിവൻകുട്ടിയോട് ഊഞ്ഞാലിലിരിക്കാൻ ആവശ്യപ്പെട്ടെങ്കിലും അദ്ദേഹം സന്തോഷപൂർവം നിരസിച്ചു. തുടർന്നാണ് മുഹമ്മദ് റിയാസിനെ ഇരുത്തി ഊഞ്ഞാലാട്ടിയത്.

സംസ്ഥാന സർക്കാരിന്റെ ഈ വർഷത്തെ ഓണം വാരാഘോഷ പരിപാടികളുടെ ഫെസ്റ്റിവൽ ഓഫീസ് സംസ്ഥാന ടൂറിസം ഡയറക്ടറേറ്റിൽ തുറന്നു. മന്ത്രി പി.എ.മുഹമ്മദ് റിയാസ് ഉദ്ഘാടനം ചെയ്തു.2025ലെ ഓണാഘോഷ പരിപാടികളുടെ ലോഗോ മന്ത്രി ജി.ആർ.അനിൽ മന്ത്രി വി.ശിവൻകുട്ടിക്ക് നൽകി പ്രകാശനം ചെയ്തു.ചടങ്ങിൽ വേഷമിട്ട മാവേലി മന്ത്രിമാരെ പൊന്നാടയണിയിച്ച് സ്വീകരിച്ചു.

കേരളത്തിന്റെ തനത് കലകൾക്കും നൃത്ത സംഗീത വാദ്യഘോഷങ്ങൾക്കും അരങ്ങൊരുക്കി,സംസ്ഥാന ടൂറിസം വകുപ്പ് സംഘടിപ്പിക്കുന്ന ഓണം വാരാഘോഷ പരിപാടികൾ സെപ്തംബർ 3 മുതൽ 9 വരെയാണ് നടക്കുന്നത്.

എം.എൽ.എമാരായ ആന്റണി രാജു,വി.ജോയി,ഐ.ബി.സതീഷ്,സി.കെ.ഹരീന്ദ്രൻ,ഒ.എസ്.അംബിക, വി.കെ.പ്രശാന്ത്,മേയർ ആര്യാ രാജേന്ദ്രൻ,ജില്ലാ പഞ്ചായത്ത് പ്രസിഡന്റ് ഡി.സുരേഷ് കുമാർ,ടൂറിസം സെക്രട്ടറി കെ.ബിജു,ടൂറിസം ഡയറക്ടർ ശിഖ സുരേന്ദ്രൻ തുടങ്ങിയവർ പങ്കെടുത്തു.തിരുവനന്തപുരം നഗരത്തിലും എല്ലാ ജില്ലകളിലും ടൂറിസം വകുപ്പ് ആസൂത്രണം ചെയ്തിട്ടുള്ള ഓണം സാംസ്‌കാരിക പരിപാടികൾ ഫെസ്റ്റിവൽ ഓഫീസ് ഏകോപിപ്പിക്കും.