വിതുര: തൊളിക്കോട് പഞ്ചായത്തിലെ കണ്ണങ്കര പാമ്പാടി റോഡ് ഗതാതാഗത യോഗ്യമാക്കുന്നതിനായി ജി.സ്റ്റീഫൻ എം.എൽ.എയുടെ പ്രാദേശിക വികസന ഫണ്ടിൽനിന്ന് തുക അനുവദിച്ചു. കണ്ണങ്കര പാമ്പാടി റോഡിന്റെ ശോച്യാവസ്ഥയും അപകടങ്ങളും ചൂണ്ടിക്കാട്ടി കേരളകൗമുദി അനവധി തവണ വാർത്ത പ്രസിദ്ധീകരിച്ചിട്ടുണ്ട്. സ്കൂൾവാഹനങ്ങളടക്കം ധാരാളം വാഹനങ്ങളും, നൂറുകണക്കിന് ആളുകളുമാണ് ഇതിലൂടെ സഞ്ചരിക്കുന്നത്.

ഗതാഗതയോഗ്യമല്ലാതെ

തൊളിക്കോട് പഞ്ചായത്തിലെ ആനപ്പെട്ടി വാർ‌ഡിലെ കണ്ണങ്കര ജംഗ്ഷനിൽ നിന്നും പാമ്പാടി മേഖലയിലേക്കുള്ള റോഡ് പൊട്ടിപ്പൊളിഞ്ഞിട്ട് വ‌ർഷങ്ങളായി. അനവധി അപകടങ്ങളും നടന്നിട്ടുണ്ട്. മഴക്കാലത്ത് റോഡിലൂടെയുള്ള യാത്ര ഏറെ അപകടം നിറഞ്ഞതാണ്. ഗട്ടറുകൾ നിറഞ്ഞ റോഡ് ഗതാഗത യോഗ്യമാക്കണമെന്നാവശ്യപ്പെട്ട് നാട്ടുകാർ എം.പിക്കും, എം.എൽ.എക്കും, ജില്ലാപഞ്ചായത്തിലും അനവധി തവണ നിവേദനം നൽകിയിട്ടുണ്ട്.

ഫണ്ട് അനുവദിച്ചു

വർഷങ്ങൾക്ക് മുൻപ് റോഡ് ഗതാഗതയോഗ്യമാക്കാൻ തുക അനുവദിച്ചെങ്കിലും നടന്നില്ല. അടുത്തിടെ റോഡ് ഏറെ ശോച്യാവസ്ഥയിലായി. കേരളകൗമുദി വാർത്ത പ്രസിദ്ധീകരിച്ചതിന്റെ ഫലമായി സി.പി.എം തൊളിക്കോട് ലോക്കൽ കമ്മിറ്റി സെക്രട്ടറി എസ്.എസ്.പ്രേംകുമാറും, ആനപ്പെട്ടി വാർഡ്മെമ്പറും പ്രശ്നത്തിൽ ബന്ധപ്പെട്ടു. തുടർന്ന് ജി.സ്റ്റീഫൻ എം.എൽ.എ റോഡ് സന്ദർശിക്കുകയും, അടിയന്തരമായി ഫണ്ട് അനുവദിക്കാൻ നടപടിൾ സ്വീകരിക്കുകയുമായിരുന്നു.

നന്ദി രേഖപ്പെടുത്തി

കണ്ണങ്കര പാമ്പാടി റോഡ് ഗതാഗതയോഗ്യമാക്കാൻ ഫണ്ട് അനുവദിച്ച ജി.സ്റ്റീഫൻ എം.എൽ.എക്ക് സി.പി.എം തൊളിക്കോട് ലോക്കൽകമ്മിറ്റി സെക്രട്ടറി എസ്.എസ്.പ്രേംകുമാറും, തൊളിക്കോട് പഞ്ചായത്ത് പ്രസിഡന്റ് വി.ജെ.സുരേഷും നന്ദി രേഖപ്പെടുത്തി.