മാന്നാർ: കുട്ടമ്പേരൂർ സെന്റ്മേരീസ് ഓർത്തഡോക്സ് ചർച്ച് (മുട്ടേൽപള്ളി) ന്റെ മുന്നിൽ സ്ഥാപിച്ച നെയിം ബോർഡ് സാമൂഹ്യ വിരുദ്ധർ നശിപ്പിക്കാൻ ശ്രമിച്ചതായി പരാതി. മാന്നാർ പുലിയൂർ റോഡരികിൽ മുട്ടേൽ ജംഗ്ഷനിൽ സ്ഥിതിചെയ്യുന്ന ചെങ്ങന്നൂർ ഭദ്രാസനത്തിന്റെ കീഴിലുള്ള കുട്ടമ്പേരൂർ ഓർത്തഡോക്സ് ചർച്ചിന്റെ മതിൽക്കെട്ടിനുള്ളിൽ സ്ഥാപിച്ച ഡിസ്പ്ലേ ബോർഡാണ് ചൊവ്വാഴ്ച പുലർച്ചെ സാമൂഹ്യവിരുദ്ധൻ കമ്പി കുത്തിക്കയറ്റി നശിപ്പിക്കാൻ ശ്രമിച്ചത്. പുലർച്ചെ മൂന്നു മണിയോട സ്കൂട്ടറിൽ എത്തിയ ഒരാൾ പള്ളിയുടെ മുന്നിൽ നിന്ന് കമ്പി ഉപയോഗിച്ച് ബോർഡ് നശിപ്പിക്കാൻ ശ്രമിക്കുന്നതിന്റെ സി.സി.ടി.വി ദൃശ്യം സഹിതം സെന്റ്മേരീസ് ഓർത്തഡോക്സ് ചർച്ച് ഇടവക ഭരണസമിതിക്ക് വേണ്ടി ട്രസ്റ്റി സാമുവൽ സണ്ണി മാന്നാർ പൊലീസിൽ പരാതി നൽകി.