മാവേലിക്കര: ഓലകെട്ടിയമ്പലം മെഫേയർ ബാറിലെ ജീവനക്കാരെ അക്രമിച്ച കേസിലെ പ്രതികൾ അറസ്റ്റിൽ. ബാർ അടച്ച ശേഷം മദ്യം നൽകാതിരുന്നതിലുള്ള വിരോധമാണ് ആക്രമണത്തിൽ കലാശിച്ചത്. 6ന് രാത്രി 12.15നാണ് ആക്രമണം നടന്നത്. ജോലികഴിഞ്ഞ് പോവുകയായിരന്ന ഓലകെട്ടിയമ്പലം മെഫേയർ ബാറിലെ ജീവനക്കാരെ രണ്ട് ബൈക്കുകളിലായെത്തിയ പ്രതികൾ തടഞ്ഞു നിറുത്തി കമ്പിവടികൊണ്ടും വടിവാൾ കൊണ്ടും അക്രമിക്കുകയായിരുന്നു. കായംകുളം മേനാമ്പള്ളി അജേഷ് ഭവനത്തിൽ അജിൻ, കായംകുളം മേനാമ്പള്ളി കൊട്ടാരത്തിൽ വീട്ടിൽ അജയ് ഹരീഷ്, കൊല്ലം തിരുമുല്ലാവാരം കവയത്ത് തെക്കതിൽ ശ്രീലാൽ, ഭരണിക്കാവ് പള്ളയ്ക്കൽ നടുവിലെമുറി പുത്തൻപുരകിഴക്കതിൽ ശ്രീനി എന്നിവരാണ് അറസ്റ്റിലായത്. കുറത്തികാട് ഐ.എസ്.എച്ച്.ഒ മോഹിത് പി.കെ, സബ് ഇൻസ്‌പെക്ടർ ഉദയകുമാർ.വി, എ.എസ്.ഐ രാജേഷ്, സി.പി.ഒ സതീഷ് കുമാർ, വിൻജിത്ത്, ഷിതിൻ രാജ് എന്നിവരടങ്ങുന്ന സംഘമാണ് പ്രതികളെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.