അമ്പലപ്പുഴ : ആലപ്പുഴ മെഡിക്കൽ കോളേജ് ആശുപത്രിയുടെ ഭാഗമായ സൂപ്പർ സ്പെഷ്യാലിറ്റി ബ്ളോക്കിൽ ലിഫ്ട് തകരാറിലായതിനെത്തുടർന്ന് ഹൃദ്രോഗികളടക്കം ദുരിതത്തിൽ. ഇവിടെ ആകെയുള്ള രണ്ട് ലിഫ്ടുകളിലൊന്നാണ് പണിമുടക്കിയത്.

മൂന്ന് വർഷത്തെ പഴക്കമേ ഇതിനുള്ളൂ. സെപ്റ്റംബറിൽ മാത്രം ഇവിടെ 2 പ്രാവശ്യം ലിഫ്റ്റ് പണിമുടക്കി. പ്രവർത്തിക്കുന്ന ഒരു ലിഫ്റ്റിൽ മറ്റുള്ളവരും കൂടി കയറുമ്പോൾ 3-ാം നില വരെ പോയി ലിഫ്റ്റ് മടങ്ങിവരാൻ ഏറെസമയം എടുക്കും. ഇതോടെ, കിടപ്പുരോഗികളേയും കൊണ്ട് വീൽച്ചെയറിലും ട്രോളിയിലും പോകുന്നവർക്ക് ഏറെനേരം കാത്തുനിൽക്കേണ്ടിയും വരും.

ഒ.പിയിൽ എത്താൻ പാടുപെടണം

 ഹൃദ്രോഗികൾക്ക് ഒ.പി വിഭാഗത്തിൽ ചികിത്സയ്ക്കായും എക്കോ എടുക്കാനായും ഒന്നാം നിലയിൽ എത്തേണ്ടതുണ്ട്

 ലിഫ്ട് തകരാറായതിനെ തുടർന്ന് പടി കയറി മുകളിൽ കയറാൻ പറ്റുന്നവർ മാത്രമാണ് ഒ.പി വിഭാഗത്തിൽ എത്തുന്നത്

 5 ദിവസമായി തകരാറിലായ ലിഫ്ടിൽ അറ്റകുറ്റപ്പണി നടത്താൻ അധികൃതർ തയാറാകാത്തതാണ് രോഗികളെ വലയ്ക്കുന്നത്

 അടിക്കടി ലിഫ്ട് തകരാറിലാകുന്നതിനെതിരെ രോഗികൾക്കും കൂട്ടിരിപ്പുകാർക്കുമിടയിൽ പ്രതിഷേധമുയരുന്നുണ്ട്

നിലവാരം കുറഞ്ഞതായതുകൊണ്ടാണ് ലിഫ്റ്റ് അടിക്കടി തകരാറിലാകുന്നത്. എത്രയും പെട്ടെന്ന് തകരാർ പരിഹരിക്കണം

- രോഗികൾ