കൊച്ചി: നിർമ്മിത ബുദ്ധിയുടെ സാദ്ധ്യതകൾ കണ്ടെത്തി ശ്രദ്ധേയനായ സർക്കാർ സ്‌കൂൾ വിദ്യാർത്ഥി റൗൾ ജോൺ അജു (16) സാധാരണക്കാരെയും എ.ഐ. സാക്ഷരരാക്കാനുള്ള ദൗത്യവുമായി രംഗത്ത്. വിദേശ വിദ്യാർത്ഥികൾക്ക് നൽകിയ ഓൺലൈൻ ക്ലാസുകൾ ഇനി സൗജന്യമായി യൂട്യൂബ് ചാനലിലൂടെ ലഭ്യമാക്കും.

സൗജന്യ എ.ഐ. പാക്കേജ്
റൗൾ രൂപം നൽകിയ 30 ദിവസത്തെ ഈ സൗജന്യ പാക്കേജ്, നിർമ്മിത ബുദ്ധിയുടെ അടിസ്ഥാന തത്വങ്ങളിൽ നിന്ന് തുടങ്ങി, ന്യൂറൽ നെറ്റ്‌വർക്ക്‌സ്, ട്രാൻസ്‌ഫോമേഴ്‌സ്, ആർ.എ.ജി. തുടങ്ങിയ വിഷയങ്ങളിലൂടെ കടന്നുപോയി, ജനറേറ്റീവ് എ.ഐയിൽ എത്തിനിൽക്കുന്നതാണ്.

ഈ ക്ലാസുകൾ സെപ്റ്റംബർ 15 മുതൽ RaulTheRockstar എന്ന യൂട്യൂബ് ചാനലിലൂടെയും Airealm.pro/30 എന്ന വെബ്സൈറ്റ് വഴിയും ലഭ്യമാകും. വിദേശവിദ്യാർത്ഥികൾക്ക് സബ്സ്ക്രിപ്ഷനിലൂടെയാണ് ക്ലാസുകൾ നൽകിയിരുന്നത്. ഇടപ്പള്ളി അമൃതനഗറിൽ അജു ജോസഫിന്റെയും ഷേബ ആനിന്റെയും മകനാണ് റൗൾ.

 മിടുക്കനായ വിദ്യാർത്ഥി
നോർത്ത് ഇടപ്പള്ളി ഗവ. വി.എച്ച്.എസ്.എസിലെ പ്ലസ് വൺ വിദ്യാർത്ഥിയാണ് റൗൾ ജോൺ അജു. ശാസ്ത്ര വെബ്‌സൈറ്റുകളിലൂടെ നേടിയ അറിവുകൾ ഉപയോഗിച്ച്, അപ്പർ പ്രൈമറി ക്ലാസുകളിൽ പഠിക്കുമ്പോൾത്തന്നെ നിർമ്മിത ബുദ്ധിയുടെ ആപ്ലിക്കേഷനുകളിൽ ഈ മിടുക്കൻ പ്രാവീണ്യം നേടിയിരുന്നു. സങ്കീർണമായ കാര്യങ്ങൾ ഗെയിം ശൈലിയിൽ ലളിതമായി അവതരിപ്പിക്കുന്നതാണ് റൗളിന്റെ പ്രത്യേകത. ക്ലാസുകൾ എടുക്കുന്നതിനായി റൗൾ സ്വന്തമായി ഒരു റോബോട്ടിനെയും നിർമ്മിച്ചിട്ടുണ്ട്.