മൂവാറ്റുപുഴ: ഗുരുദേവ ജയന്തി ആഘോഷങ്ങൾക്കുള്ള ഒരുക്കങ്ങൾ മൂവാറ്റുപുഴ യൂണിയനിൽ പൂർത്തിയായതായി യൂണിയൻപ്രസിഡന്റ് വി.കെ. നാരായണൻ, സെക്രട്ടറി അഡ്വ. എ.കെ. അനിൽകുമാർ എന്നിവർ അറിയിച്ചു. ശ്രീനാരായണഗുരുവിന്റെ 171-ാമത് ജയന്തി ആഘോഷങ്ങളുടെ ഭാഗമായി മൂവാറ്റുപുഴ നഗരം പീതവർണത്തിൽ മൂടി.
യൂണിയൻ ആസ്ഥാനം മുതൽ നഗരത്തിലെ പ്രധാന കേന്ദ്രങ്ങളായ കച്ചേരിത്താഴം ,പുതിയ പാലം, ബി.ഒ.സി, വെള്ളൂർക്കുന്നം, പി.ഒ ജംഗ്ഷൻ, ആശ്രമം ബസ് സ്റ്റാൻഡ്, കെ.എസ്.ആർ.ടി.സി ബസ് സ്റ്റാൻഡ് എന്നിവിടങ്ങളിലെല്ലാം മഞ്ഞക്കൊടിയും ഗുരുദേവചിത്രങ്ങളുംകൊണ്ട് നിറഞ്ഞു.
ജയന്തിദിന ഘോഷയാത്ര
യൂണിയൻ കീഴിലുള്ള 33 ശാഖകളിലും ജയന്തി ആഘോഷത്തിനുള്ള തയ്യാറെടുപ്പ് പൂർത്തിയായി. രാവിലെ ശാഖകളിൽ പ്രാ‌ർത്ഥനയും ഗുരുദേവ കീർത്തനാലാപനവും ഉച്ചയ്ക്ക് പ്രസാദ ഊട്ടും നടക്കും. തുടർന്ന് കുടുംബാംഗങ്ങൾ ഒന്നാകെ യൂണിയൻ ആസ്ഥാനത്തേയ്ക്ക് ഒഴുകിയെത്തും. ആയിരക്കണക്കിന് ശ്രീനാരായണീയർ മൂവാറ്റുപുഴ കെ.എസ്.ആർ.ടി.സി ജംഗ്ഷനിൽ പ്രത്യേകം തയ്യാറാക്കിയ മണ്ഡപത്തിൽ ഒത്തുകൂടിയശേഷം മഹാഘോഷയാത്ര ആരംഭിക്കും. എല്ലാശാഖകളിൽനിന്നും വിവിധ കലാരൂപങ്ങളും നിശ്ചലദൃശ്യങ്ങളും വിവിധ വാദ്യമേളങ്ങളും അണിനിരത്തുന്ന ഘോഷയാത്ര വർണ്ണാഭമാകും. കെ.എസ്.ആർ.ടി.സി ജംഗ്ഷനിൽ പ്രത്യേകം തയ്യാറാക്കിയ മണ്ഡപത്തിൽ നിന്ന് ആരംഭിക്കുന്ന ജയന്തി ഘോഷയാത്ര പി.ഒ ജംഗ്ഷൻ, കച്ചേരിത്താഴം, നെഹ്റു പാർക്ക് ചുറ്റി ടൗൺഹാളിൽ സമാപിക്കും.
മഹാജയന്തിസമ്മേളനം
മഹാജയന്തിസമ്മേളനം ഡീൻ കുര്യാക്കോസ് എം.പി ഉദ്ഘാടനം ചെയ്യും. യൂണിയൻ പ്രസിഡന്റ് വി.കെ. നാരായണൻ അദ്ധ്യക്ഷത വഹിക്കും. യൂണിയൻ സെക്രട്ടറി അഡ്വ.എ.കെ. അനിൽകുമാർ സ്വാഗതം പറയും. ഡോ. മാത്യു കുഴൽനാടൻ എം.എൽ.എ മുഖ്യ പ്രഭാഷണം നടത്തും. കേരള ബാങ്ക് പ്രസിഡന്റ് ഗോപി കോട്ടമുറിക്കൽ ചതയ ദിന സന്ദേശവുംസമ്മാന ദാനവും നർവ്വഹിക്കും. നഗരസഭ ചെയർമാൻ പി.പി. എൽദോസ് വിദ്യാഭ്യാസ അവാർഡുകൾ വിതരണം ചെയ്യും. വാർഡ് കൗൺസിലർ ജിനു മടേക്കൽ, യോഗം ഡയറക്ടർ ബോർഡ് മെമ്പർമാരായ അഡ്വ.എൻ. രമേശ് , പ്രമോദ് കെ. തമ്പാൻ എന്നിവർ സംസാരിക്കും. യൂണിയൻ കൗൺസിലർമാരായ പി.ആർ. രാജു, എം.ആർ. നാരായണൻ, ടി.വി. മോഹനൻ, അനിൽ കാവുംചിറ, യൂണിയൻ പഞ്ചായത്ത് സമിതി അംഗങ്ങളായ എം.എസ്. വിത്സൻ, എൻ.ആർ. ശ്രീനിവാസൻ, യൂണിയൻ വനിതാസംഘം പ്രസിഡന്റ് ഷീല അനിരുദ്ധൻ,സെക്രട്ടറി സുഹാസിനി സാജൻ , യൂണിയൻ യൂത്ത് മൂവ്മെന്റ് പ്രസിഡന്റ് ദീപു കെ.എ, സെക്രട്ടറി പി.എസ്. ശ്രീജിത്, യൂണിയൻ എംപ്ലോയ്സ് ഫോറം പ്രസിഡന്റ് കെ.ജി. അരുൺകുമാർ, റ്റി.എൻ. സുനിൽകുമാർ, യൂണിയൻ പെൻഷനേഴ്സ് കൗൺസിൽ പ്രസിഡന്റ് കെ.കെ.രാജൻ, സെക്രട്ടറി എം.എസ്.ഷാജി എന്നിവർ പങ്കെടുക്കും. യൂണിയൻ വൈസ് പ്രസിഡന്റ് പി.എൻ. പ്രഭ നന്ദി പറയും.