പള്ളുരുത്തി: മരത്തിൽ കുടുങ്ങി മരണത്തോട് മല്ലടിച്ചുകൊണ്ടിരുന്ന കാക്കയെ അടി​യന്തരമായി​ രക്ഷിക്കാൻ ബംഗളൂരുവിൽനിന്ന് വി​മാനത്തി​ൽ കൊച്ചിയിലെത്തി ജീവകാരുണ്യ പ്രവർത്തകൻ മുകേഷ് ജെയി​ൻ. എല്ലാ ജീവികളുടെയും പ്രാണൻ വിലപ്പെട്ടതാണെന്ന കാഴ്ചപ്പാടാണ് മട്ടാഞ്ചേരി സ്വദേശിയായ മുകേഷ് ജെയി​നി​ന്റേത്.

പെരുമ്പടപ്പ് എസ്.എൻ റോഡിന് സമീപത്തെ വൃക്ഷത്തിൽ ഏതാണ്ട് മുപ്പതടി ഉയരത്തിൽ നൈലോൺപട്ടച്ചരടിൽ കുടുങ്ങിക്കി​ടക്കുകയായിരുന്നു കാക്ക. വെയിലും മഴയുമേറ്റ് മൃതപ്രായനായി തൂങ്ങി​ക്കി​ടക്കുന്ന കാക്ക കെ.ഡി. ദിലേഷ്, എം.എസ്. രാജേഷ്‌കുമാർ, കെ.കെ. സത്യപാലൻ എന്നിവരുടെ ശ്രദ്ധയി​ൽപ്പെടുകയായി​രുന്നു. ശ്രീകൃഷ്ണ ജയന്തിയോടനുബന്ധിച്ച് പതാക ഉയർത്താനെത്തിയതായിരുന്നു ഇവർ. ഫയർഫോഴ്സിൽ അറിയിച്ചെങ്കിലും അവർ ജീവകാരുണ്യ പ്രവർത്തകൻ മുകേഷ് ജെയി​നി​നെ ബന്ധപ്പെടുവാൻ നിർദ്ദേശിക്കുകയായിരുന്നു. ഈ സമയത്ത് മുകേഷ് ജെയി​ൻ ബംഗളൂരുവിലായിരുന്നു. വി​വരം അറി​ഞ്ഞ ഉടനെ അടുത്ത വി​മാനത്തി​ൽ മുകേഷ് കൊച്ചിയിലെത്തി പറവകളെ രക്ഷിക്കുവാനുള്ള ഉപകരണം വീട്ടിൽനിന്നെടുത്ത് സ്ഥലത്തേക്ക് പുറപ്പെടുകയായി​രുന്നു. സഹപ്രവർത്തകരായ എം.എം. സലിം, വി. എ. അൻസാർ എന്നിവരുമെത്തി. തുടർന്ന് വളരെ വേഗത്തി​ൽ കാക്കയെ താഴെയി​റക്കി​. പ്രാഥമി​കശുശ്രൂഷ നൽകി​ പറത്തിവിട്ടു.

2007 മുതലാണ് പറവകളെ രക്ഷപ്പെടുത്തുന്ന പ്രവർത്തനം മുകേഷ് ആരംഭിച്ചത്. ഇതിനകം ആറായിരത്തോളം പറവകളെ രക്ഷിച്ചിട്ടുണ്ട്. പട്ടം പറത്താൻ നൈലോൺ നൂൽ ഉപയോഗിക്കുന്നതാണ് പറവകൾക്ക് വിനയാകുന്നത്. പൊട്ടി​പ്പോകുന്ന പട്ടങ്ങളുടെ ദ്രവിക്കാത്ത നൈലോൺനൂലുകൾ മരത്തിൽ കുടുങ്ങിക്കിടപ്പുണ്ടാകും. ഇതിൽ പറവകൾ കുടുങ്ങുന്നതാണ് പ്രശ്നം. പട്ടങ്ങളി​ൽ കോട്ടൺനൂൽ ഉപയോഗിച്ചാൽ ഈ അവസ്ഥ ഒഴി​വാക്കാനാകുമെന്ന് മുകേഷ് ജെയി​ൻ പറയുന്നു.