കൊച്ചി: ഡ്യൂട്ടിയിൽ ഇല്ലാത്ത സമയത്ത്, മദ്യപിച്ച് വാഹനപരിശോധന നടത്തി​യ കാക്കനാട് അസിസ്റ്റന്റ് മോട്ടോർ വെഹിക്കിൾ ഇൻസ്‌പെക്ടർ എൻ.എസ്. ബിനുവി​നെ ഗതാഗത കമ്മിഷണർ നാഗരാജു സസ്‌പെൻഡ് ചെയ്തു. വകുപ്പുതല അന്വേഷണത്തിനും ഉത്തരവായി​. കാക്കനാട് തോപ്പിൽ ജംഗ്ഷനി​ൽ ബുധനാഴ്ച രാത്രി 7.30ന്​ നടന്ന സംഭവത്തി​ന്റെ ദൃശ്യങ്ങൾ വൈറലായി​രുന്നു. ബിനു യൂണി​ഫോമി​ലുമായി​രുന്നി​ല്ല.

വഴി​യോരത്ത് വാഹനത്തി​ൽ മീൻകച്ചവടം നടത്തിയ ദമ്പതികളോടാണ് 3000 രൂപ പിഴ ആവശ്യപ്പെട്ട് ബി​നു ബഹളമുണ്ടാക്കി​യത്. നാട്ടുകാർ ​തൃക്കാക്കര പൊലീസിനെ അറി​യി​ച്ചു. ബ്രെത്ത് അനലൈസർ പരി​ശോധനയി​ൽ മദ്യപിച്ചതായി സ്ഥി​രീകരി​ച്ചതോടെ അറസ്റ്റ് ചെയ്ത് സ്റ്റേഷനിലേക്ക് കൊണ്ടുപോയി. മദ്യപിച്ച് അലക്ഷ്യമായി വാഹനം ഓടിച്ചതിനാണ് കേസ്. തൃപ്പൂണിത്തുറ താലൂക്ക് ആശുപത്രിയിൽ വൈദ്യപരി​ശോധനയ്‌ക്ക് ശേഷം രാത്രി തന്നെ ജാമ്യത്തി​ൽ വി​ട്ടു.

അപമര്യാദയായി പെരുമാറിയതിന് കച്ചവടക്കാരിയും കുടുംബവും ബിനുവിനെതിരെ തൃക്കാക്കര സ്റ്റേഷനിൽ പരാതി കൊടുത്തിട്ടുണ്ട്. വകുപ്പുതല അന്വേഷണത്തിന് മൂവാറ്റുപുഴ ആർ.ടി.ഒയെ ഗതാഗത കമ്മിഷണർ ചുമതലപ്പെടുത്തി.