കൊച്ചി: കേരളത്തിൽ നിക്ഷേപം നടത്താൻ താത്പര്യം അറിയിച്ച് അമേരിക്കയിലെ ന്യൂജേഴ്‌സി ഗവർണർ ഫിലിപ്പ് ഡി മർഫി. ലുലു ഗ്രാൻഡ് ഹയാത്തിൽ നടന്ന ബിസിനസ് പാർട്ണർഷിപ്പ് മീറ്റിലും അത്താഴ വിരുന്നിലും പങ്കെടുത്ത് സംസാരിക്കുകയായിരുന്നു അദ്ദേഹം. നിക്ഷേപം നടത്താൻ അനുയോജ്യമായ സമയത്താണ് സന്ദർശനമെന്നും ഗവർണർ പറഞ്ഞു.
ഉന്നത വിദ്യാഭ്യാസ മേഖലയിലും തൊഴിൽ രംഗത്തും കേരളത്തിൽ നിക്ഷേപം നടത്താനുള്ള ന്യൂജേഴ്‌സി ഭരണകൂടത്തിന്റെ താൽപ്പര്യം മുഖ്യമന്ത്രി പിണറായി വിജയനെ അദ്ദേഹം അറിയിച്ചു. കേരളം നിക്ഷേപ സംസ്ഥാനമാണ്, ന്യൂജേഴ്‌സിയിൽ ഇന്ത്യൻ കമ്പനികൾക്കുള്ള സാധ്യതകൾ വിപുലമാണ്. ഇന്ത്യക്കാർക്കായി തന്റെ കാലത്ത് 3000ത്തിലധികം തൊഴിൽ അവസരങ്ങൾ സൃഷ്ടിച്ചു. മുഖ്യമന്ത്രി പിണറായി വിജയൻ കരുത്തനായ ഭരണാധികാരിയാണെന്നും അദ്ദേഹം പ്രശംസിച്ചു.
ന്യൂജേഴ്‌സി സർക്കാരിനെ നിക്ഷേപം നടത്താൻ കേരളത്തിലേക്ക് ക്ഷണിച്ച മുഖ്യമന്ത്രി ആധുനിക വിമാനത്താവളങ്ങളും തുറമുഖങ്ങളുമായി രാജ്യത്തിന് മാതൃകയായി കേരളം കുതിക്കുകയാണെന്നും പറഞ്ഞു. കേരളത്തിൽ നിക്ഷേപം നടത്താനുള്ള ന്യൂജേഴ്‌സി സർക്കാരിന്റെ ശ്രമങ്ങളെ നോർക്ക റൂട്ട്‌സ് വൈസ് ചെയർമാനും ലുലു ഗ്രൂപ്പ് ചെയർമാനുമായ എം.എ യൂസഫലി സ്വാഗതം ചെയ്തു. ഗവർണർ ഫിലിപ്പ് ഡി മർഫിയുടെ ഭാര്യ താമി മർഫി, മന്ത്രി പി രാജീവ്, മേയർ എം. അനിൽകുമാർ, ന്യൂജേഴ്‌സി സർക്കാർ പ്രതിനിധികൾ, സംസ്ഥാന സർക്കാർ മേധാവികൾ, രാജ്യത്തെ ബിസിനസ് സംരംഭകർ പങ്കെടുത്തു.