കളമശേരി: നിയമസഭാ മണ്ഡലത്തിലെ 41 സ്കൂളുകളിൽ സ്ഥാപിച്ച റിവേഴ്സ് ഓസ്‌മോസിസ് പ്ളാന്റുകൾ വ്യവസായമന്ത്രി പി. രാജീവ് ഉദ്ഘാടനം ചെയ്തു. അയിരൂർ സെന്റ് തോമസ് സ്കൂളിലെ ചടങ്ങിൽ സംഗീത സംവിധായകൻ സ്റ്റീഫൻ ദേവസി മുഖ്യാതിഥിയായി.

കുന്നുകര ഗ്രാമപഞ്ചായത്ത് പ്രസിഡന്റ് സൈന ബാബു അദ്ധ്യക്ഷയായി. പാറക്കടവ് ബ്ലോക്ക് പഞ്ചായത്ത് പ്രസിഡന്റ് ടി.വി. പ്രദീഷ്, ആലങ്ങാട് ബ്ലോക്ക് പഞ്ചായത്ത് പ്രസിഡന്റ് രമ്യ തോമസ്, ഡി.ഡി.ഇ സുബിൻപോൾ, സിയാൽ എക്സിക്യൂട്ടീവ് ഡയറക്ടർ ജയരാജ്, ലയൺസ് ക്ലബ് ഡിസ്ട്രിക്ട് ഗവർണർ കെ.ബി. ഷൈൻകുമാർ, ഫാ. ജോയ്സ് കൈതക്കൂട്ടിൽ തുടങ്ങിയവർ സംസാരിച്ചു.

3 കോടിരൂപ ചെലവഴിച്ചാണ് ആർ.ഒ പ്ളാന്റുകൾ സ്ഥാപിച്ചത്. ഒരു പ്ലാന്റ് സ്ഥാപിക്കാൻ 7.16 ലക്ഷംരൂപ ചെലവഴിച്ചു. 500ലിറ്റർശേഷിയുള്ള ടാങ്കുകളാണ് ഓരോ സ്കൂളിലും സ്ഥാപിച്ചിട്ടുള്ളത്. കൊച്ചി വിമാനത്താവള കമ്പനിയുടെ പിന്തുണയോടെയാണ് ജലധാര എന്ന് പേരിട്ട പദ്ധതി നടപ്പാക്കുന്നത്.