കോതമംഗലം: മൂന്ന് പതിറ്റാണ്ടിലേറെയായി കോതമംഗലം നിവാസികൾ കാത്തിരിക്കുന്ന ദേശീയപാത ബൈപ്പാസിന്റെ അലൈൻമെന്റ് വീണ്ടും മാറിയേക്കും. നിലവിൽ മാതിരപ്പിള്ളിയെയും അയ്യങ്കാവിനെയും ബന്ധിപ്പിക്കുന്ന അലൈൻമെന്റാണ് പരിഗണനയിലുള്ളതെങ്കിലും സ്ഥലമെടുപ്പുമായി ബന്ധപ്പെട്ട സാമ്പത്തിക പ്രതിസന്ധിയെ തുടർന്നാണ് മാറ്റം.

പദ്ധതിക്ക് നേരിട്ട തിരിച്ചടികൾ
കോതമംഗലം ടൗണിലെ ഗതാഗതക്കുരുക്ക് ഒഴിവാക്കുന്നതിനും കൂടുതൽ പ്രദേശങ്ങളിലേക്ക് വികസനം എത്തിക്കുന്നതിനും ബൈപ്പാസ് സഹായകമാകും. ആദ്യ അലൈൻമെന്റ് മാതിരപ്പിള്ളിയെയും കോഴിപ്പിള്ളിയെയും ബന്ധിപ്പിക്കുന്നതായിരുന്നു. മൂന്ന് പതിറ്റാണ്ടോളം പരിഗണനയിലായിരുന്ന അലൈൻമെന്റ് മാറ്റി രണ്ടുവർഷം മുമ്പാണ് രണ്ടാമത്തെ അലൈൻമെന്റ് തയ്യാറാക്കിയത്. ഈ അലൈൻമെന്റ് പ്രകാരം അതിവേഗം നടപടികൾ പുരോഗമിച്ചുവെങ്കിലും സ്ഥലമെടുപ്പിനുള്ള ഫണ്ട് നൽകില്ലെന്ന് സംസ്ഥാന സർക്കാർ വ്യക്തമാക്കിയതോടെ ദേശീയപാത അതോറിട്ടിയുടെ നടപടികൾ നിലച്ചു.

ചെലവ് കുറയ്ക്കാൻ പുതിയ നീക്കം
കഴിഞ്ഞ വർഷം ഡിസംബറിൽ സ്ഥലമെടുപ്പിനുള്ള വിജ്ഞാപനം കാലഹരണപ്പെട്ടതോടെ, പദ്ധതി തുടക്കം മുതൽ വീണ്ടും ആരംഭിക്കേണ്ട അവസ്ഥയിലാണ്. സ്ഥലമെടുപ്പിനുള്ള ചെലവ് കുറയ്ക്കുക എന്നതാണ് ഇപ്പോഴത്തെ തീരുമാനം. ഇതിനായി കൺസൾട്ടൻസിയെ കണ്ടെത്തുന്നതിനുള്ള ടെൻഡർ നടപടികൾ നടന്നുവരികയാണ്. ചെലവ് കുറയ്ക്കുന്നതിന്റെ ഭാഗമായി ബൈപ്പാസിന്റെ നീളവും വീതിയും കുറയ്‌ക്കേണ്ടിവരും. ഏറ്റെടുക്കേണ്ട വീടുകളുടെയും മറ്റ് കെട്ടിടങ്ങളുടെയും എണ്ണം കുറയ്ക്കുന്നതിനും പുതിയ അലൈൻമെന്റ് സഹായിക്കും.

ഭൂവുടമകളുടെ ആശങ്കകൾ
രണ്ട് അലൈൻമെന്റ് പ്രകാരവും സ്ഥലം അളന്ന് അതിർത്തിക്കല്ലുകൾ സ്ഥാപിക്കുകയും നിർമ്മാണവും ക്രയവിക്രയങ്ങളും വിലക്കുകയും ചെയ്തിരുന്നു. ആദ്യ അലൈൻമെന്റിൽ ഉൾപ്പെട്ടവർ മൂന്ന് പതിറ്റാണ്ടിലേറെക്കാലമാണ് ഈ കാരണം മൂലം ബുദ്ധിമുട്ടനുഭവിച്ചത്. സർക്കാർ സ്ഥലം ഏറ്റെടുക്കുമോയെന്ന് പേടിച്ച് താമസസ്ഥലം മാറ്റിയവരുമുണ്ട്. രണ്ടാമത്തെ അലൈൻമെന്റ് പ്രകാരം രേഖകൾ സമർപ്പിച്ച് കാത്തിരിക്കുമ്പോഴാണ് പ്രതിസന്ധി ഉടലെടുത്തത്. വിഷയത്തിൽ വലിയ ആശങ്കയിലാണ് ഇവിടുത്തെ ഭൂവുടമകൾ.

അലൈൻമെന്റിൽ മാറ്റം വരുത്തുന്നതിനോട് യോജിപ്പില്ലെങ്കിലും ചെലവ് കുറച്ചാൽ മാത്രമേ പദ്ധതി നടപ്പിലാകൂ എന്ന വസ്തുത നിലവിലുണ്ട്.

ഡീൻ കുര്യാക്കോസ് എം.പി