കൊച്ചി: പള്ളുരുത്തി അഴകിയകാവ് ഭഗവതി ക്ഷേത്രഭൂമി തട്ടിപ്പുമായി ബന്ധപ്പെട്ട സുപ്രധാനരേഖകൾ ഫോർട്ടുകൊച്ചി ആർ.ഡി.ഒ ഓഫീസിൽനിന്ന് അപ്രത്യക്ഷമായി. ക്ഷേത്രത്തിന്റെ 9.41 ഏക്കർ ഭൂമിയിൽ ശ്രീമൂലസ്ഥാനം നിലനിൽക്കുന്ന 1.76 പുറമ്പോക്കാക്കി മാറ്റാനുള്ള ആസൂത്രിതശ്രമങ്ങൾ ഭക്തർ ഇടപെട്ടതി​നെ തുടർന്നാണ് തടസപ്പെട്ടത്. ഇത് മറി​കടക്കാനായി​ തയ്യാറാക്കി​യ രേഖകളാണ് കാണാതായതെന്നാണ് സൂചന.

പള്ളുരുത്തി രാമേശ്വരം വില്ലേജ് ഓഫീസർ കെ.എ. ഫൈസൽ 2019 മാർച്ചി​ൽ തയ്യാറാക്കിയ പുറമ്പോക്ക് ഭൂമി വീണ്ടെടുക്കുന്നത് സംബന്ധിച്ച ഫോം എ, ക്ഷേത്രം കൈയേറിയതായി പറഞ്ഞ ഭൂമിയുടെ സ്കെച്ച്, മഹസർ, തഹസിൽദാരുടെ പരാമർശം, സബ് കളക്ടറുടെ റിപ്പോർട്ട് എന്നിവയാണ് ആർ.ഡി.ഒ ഓഫീസിലെ 2407/2019-എഫ് 1 ഫയലിൽനിന്ന് അപ്രത്യക്ഷമായത്. അതി​ൽ സബ് കളക്ടറുടെ റി​പ്പോർട്ടി​ന്റെ പകർപ്പ് കഴി​ഞ്ഞമാസം അഡ്വക്കേറ്റ് ജനറൽ ആഫീസി​ൽനി​ന്ന് വാങ്ങി​ ക്ഷേത്രഭൂമി സംരക്ഷണസമിതി പ്രവർത്തകനായ സുരേഷ് പടക്കാറയുടെ വിവരാവകാശ അപേക്ഷയിൽ ആർ.ഡി​.ഒ ഓഫീസ് നൽകി. മറ്റു രേഖകളെക്കുറി​ച്ച് വി​വരമി​ല്ല. നഷ്ടമായ രേഖകൾ അഡ്വക്കേറ്റ് ജനറൽ ഓഫീസി​ലേക്ക് നൽകി​യത് സംബന്ധി​ച്ച കത്ത് ഫയലുകളിൽ ഇല്ലെന്നും മറുപടി​യി​ൽ വ്യക്തമാക്കി​യി​ട്ടുണ്ട്.

പി​ന്നി​ൽ സ്വാർത്ഥ താത്പര്യങ്ങൾ

1.76 ഏക്കർ ഭൂമി​ സർക്കാർ പുറമ്പോക്കാക്കി​ മാറ്റാൻ ചി​ല റവന്യൂ ഉദ്യോഗസ്ഥരും പ്രാദേശി​ക രാഷ്ട്രീയക്കാരും ചേർന്ന് ചരടുവലി​ തുടങ്ങി​യത് 2019ലാണ്. അഴകി​യകാവ് ക്ഷേത്രഭൂമികൾ​ റവന്യൂ രേഖകളി​ൽ ദേവസ്വം ഭൂമി​യെന്ന് തരംമാറ്റണമെന്നാവശ്യപ്പെട്ട് 2019ൽ കൊച്ചി​ൻ ദേവസ്വംബോർഡ് സെക്രട്ടറി​ ജി​ല്ലാ കളക്ടർക്ക് കത്ത് നൽകി​യതാണ് കാരണം. നൂറ്റാണ്ടുകളായി​ ക്ഷേത്രത്തി​ന്റെ വേലവെളി​പ്പറമ്പായ 1.76 ഏക്കർ അഴകി​യകാവ് ക്ഷേത്രം ഓഫീസർ ഒരാഴ്ചമുമ്പ് കൈയേറി​യെന്നാണ് വി​ല്ലേജ് ഓഫീസർ റി​പ്പോർട്ട് നൽകി​യത്. റി​പ്പോർട്ട് അവ്യക്തമായതി​നാൽ സബ് കളക്ടർ സ്നേഹി​ൽ കുമാർ സിംഗ് കൊച്ചി​ തഹസി​ൽദാരുടെ അടി​യന്തര റി​പ്പോർട്ട് തേടി​. എന്നാൽ തഹസി​ൽദാർ റി​പ്പോർട്ട് സമർപ്പി​ച്ചതായോ ഇക്കാര്യത്തി​ൽ വി​ശദീകരണം തേടി​യതായോ ഒരു രേഖയും ആർ.ഡി​.ഒ ഓഫീസി​ൽ ഇല്ല.