തൊടുപുഴ: മുട്ടം കലാകൈരളി സാംസ്‌കാരിക വേദിയും പബ്ലിക് ലൈബ്രറിയും ചേർന്ന് മൂന്ന് മുതൽ 14 വരെ ഓണോത്സവം സംഘടിപ്പിക്കുന്നു. മന്ത്രി റോഷി അഗസ്റ്റിൻ ഉദ്ഘാടനം ചെയ്യുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. ബുധനാഴ്ച വൈകിട്ട് മൂന്നിന് മുട്ടം ടാക്സി സ്റ്റാൻഡിൽ വടംവലി മത്സരം നടക്കും. ഏഴ് പേർ ഉൾപ്പെടുന്ന ടീമുകൾക്ക് മത്സരിക്കാം. രജിസ്‌ട്രേഷൻ ഫീസ് 500 രൂപ. ഒന്നാം സമ്മാനക്കാർക്ക് 5001 രൂപയും ഏത്തക്കുലയും. 4001 രൂപയും രണ്ട് കോഴികളുമാണ് രണ്ടാം സമ്മാനം. മൂന്ന് മുതൽ അഞ്ച് വരെ സ്ഥാനക്കാർക്ക് യഥാക്രമം 3001, 2001, 1001 രൂപ വീതം സമ്മാനം കിട്ടും.
വ്യാഴാഴ്ച വൈകിട്ട് നാലിന് മുട്ടം കോടതി ജംഗ്ഷൻ മുതൽ ടാക്സി സ്റ്റാൻഡ് വരെ സാംസ്‌കാരിക ഘോഷയാത്ര. തുടർന്ന് ടാക്സി സ്റ്റാൻഡിൽ നടക്കുന്ന സാംസ്‌കാരിക സമ്മേളനം ജില്ലാ പഞ്ചായത്ത് പ്രസിഡന്റ് രാരിച്ചൻ നീറണാംകുന്നേൽ ഉദ്ഘാടനം ചെയ്യും. തുടർന്ന് കരോക്കെ ഗാനമേള, കതിർകൊയ്ത്ത് നാടൻ കലാ ദൃശ്യ വിസ്മയം എന്നിവയും അരങ്ങേറും. മറ്റ് ദിവസങ്ങളിൽ സെമിനാർ ഉൾപ്പടയുള്ള പരിപാടികൾ നടക്കും. വാർത്താ
സമ്മേളനത്തിൽ സംഘാടകസമിതി ചെയർമാൻ ടി.കെ. മോഹനൻ, കൺവീനർ അഖിൽ സദാശിവൻ, ട്രഷറർ ബെന്നി പ്ലാക്കൂട്ടം, മുട്ടം പബ്ലിക് ലൈബ്രറി സെക്രട്ടറി വിൻസന്റ് ഉലഹന്നാൻ എന്നിവർ പങ്കെടുത്തു.