ഇടുക്കി: എസ്.എൻ.ഡി.പി യോഗം ശാഖാ നേതൃത്വ സംഗമം ഇന്ന് പുറ്റടിയിലും രാജാക്കാടും നടക്കും. ഇടുക്കി, മലനാട്, പീരുമേട് യൂണിയനുകളുടെ ശാഖാ നേതൃത്വ സംഗമം ഇന്ന് രാവിലെ ഒമ്പതിന് പുറ്റടി എസ്.എൻ. ഓഡിറ്റോറിയത്തിൽ നടക്കും. ഉച്ചയ്ക്ക് രണ്ടിന് രാജാക്കാട് എൻആർ സിറ്റി എസ്.എൻ.വി ഹയർസെക്കൻഡറി സ്കൂൾ ഓഡിറ്റോറിയത്തിൽ അടിമാലി, രാജാക്കാട്, നെടുങ്കണ്ടം യൂണിയനുകളുടെ ശാഖാ നേതൃത്വ സംഗമം നടക്കും. രണ്ട് സംഗമത്തിലും എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ അദ്ധ്യക്ഷത വഹിക്കും. യോഗം വൈസ് പ്രസിഡന്റ് തുഷാർ വെള്ളാപ്പള്ളി, ദേവസ്വം സെക്രട്ടറി അരയാക്കണ്ടി സന്തോഷ്, യൂണിയൻ പ്രസിഡന്റുമാരായ ബിജു മാധവൻ, എം.ബി. ശ്രീകുമാർ, സജി പറമ്പത്ത്, ചെമ്പൻകുളം ഗോപി വൈദ്യർ, പി. രാജൻ, യൂണിയൻ സെക്രട്ടറിമാരായ കെ.എസ്. ലതീഷ് കുമാർ, സുധാകരൻ ആടിപ്ലാക്കൽ, പി.ടി. ഷിബു, വിനോദ് ഉത്തമൻ, സുരേഷ് കോട്ടയ്ക്കകത്ത്, കെ.പി. ബിനു എന്നിവരുടെ നേതൃത്വത്തിൽ പതിനായിരക്കണക്കിന് ശാഖാ ഭാരവാഹികൾ പങ്കെടുക്കും. യൂണിയനിലെ ശാഖാ ഭാരവാഹികൾ, പോഷകസംഘടനാ ഭാരവാഹികൾ, കുടുംബ യൂണിറ്റ് ഭാരവാഹികൾ എന്നിവരെ പങ്കെടുപ്പിച്ചു കൊണ്ട് എസ്.എൻ.ഡി.പി യോഗമാണ് ശാഖാ നേതൃത്വ സംഗമം നടത്തുന്നത്. എസ്.എൻ.ഡി.പി യോഗത്തിന്റെ പ്രവർത്തനങ്ങൾ കാലോചിതമായ മാറ്റങ്ങൾ ഉൾക്കൊണ്ട് ശക്തമായി മുന്നേറുന്നതിന്റെ ഭാഗമായി കുടുംബ യൂണിറ്റ് തലം മുതൽ സംഘടനയ്ക്ക് കൂടുതൽ കരത്തേകാനാണ് യാേഗത്തിന്റെ നേതൃത്വത്തിൽ എല്ലാ യൂണിയനുകളിലും നേതൃസംഗമം നടത്തുന്നത്.