കട്ടപ്പന : ഹൈറേഞ്ചിന്റെ ചുരം താണ്ടി വിരുന്നെത്തുന്ന സഞ്ചാരികളെ വരവേൽക്കുന്നത് പാതയോരങ്ങളിലെ കൽബോൾസം ചെടികളാണ്. പ്രധാനമായും കട്ടപ്പന ചെറുതോണി പാതയിലൂടെ യാത്ര ചെയ്യുന്നവർക്കാണ് കൽബോൾസം ചെടികൾ വിരുന്ന് സമ്മാനിക്കുന്നത്. പാതയോരങ്ങളിലെ കൊച്ചു വെള്ളച്ചാട്ടങ്ങൾക്ക് സമീപവും ഈർപ്പമുള്ള പാറക്കെട്ടുകളിലുമാണ് ഈ ചെറു പൂച്ചെടികൾ പൂത്തുലഞ്ഞു നിൽക്കുന്നത്.
പശ്ചിമഘട്ടത്തിലേ നനവാർന്ന പാറക്കെട്ടുകളിൽ വളരുന്ന ചെറു സത്യമാണിത്.ഇതിന്റെ വേരുകൾ പാറകളിൽ പറ്റിപ്പിടിച്ചു വളരുന്നു. 6 ൽ താഴെ ഇലകൾ മാത്രമാണ് സസ്യത്തിന് ഉണ്ടാവുക. അവ ദീർഘവൃത്തം, വൃത്തം,ഹൃദയാകാരം എന്നിങ്ങനെ പല രൂപത്തിൽ കാണപ്പെടുന്നു. ഈ ഇലകൾക്കൊപ്പം ചെടിയിൽ വിരിയുന്ന ചെറുപുഷ്പം ആരുടെയും മനം കവരുന്നു. ഒരേസമയം ഒന്നിലധികം പൂക്കൾ വിരിയും. പൂക്കൾ ഒന്നിലധികം ദിവസം നിലനിൽക്കും. വെള്ള മുതൽ കടും പിങ്ക് വരെ പല നിറങ്ങളിൽ പൂക്കൾ കാണാം. പൂവിന്റെ ആകൃതിയിലും ആകർഷണീയത വളരെയധികമാണ്. വെള്ളച്ചാട്ടങ്ങളോട് ചേർന്നുള്ള ഈ ചെടികൾക്ക് സമീപം നിന്ന് ഫോട്ടോ എടുക്കുന്നവരുടെ എണ്ണവും വളരെയധികം ആണ്. കൂട്ടത്തോടെ വളർന്നു പിടിക്കുന്ന ഇവ മലയോര പാതകൾക്ക് പ്രത്യേക അഴക് സമ്മാനിക്കുന്നു. മൺസൂണിന്റെ അവസാന കാലഘട്ടത്തോടെ ഈ ചെടികൾ നശിക്കും. ഓണ നാളുകളെ വിളിച്ചോതുന്ന ഈ വഴിയോര കാഴ്ചകൾ സഞ്ചാരികളാണ് ഏറ്റവും അധികം ആസ്വദിക്കുന്നത്

.