കട്ടപ്പന :എൽഡിഎഫ് സർക്കാരുകളുടെ കാലത്ത് വികസനരംഗത്ത് ഇടുക്കി വലിയ മുന്നേറ്റമുണ്ടാക്കിയതായി എം എം മണി എം.എൽ.എ ചെമ്പകപ്പാറ ഗവ. ഹൈസ്‌കൂളിൽ വിദ്യാകിരണം പദ്ധതിപ്രകാരം ഒരുകോടി മുതൽമുടക്കിലുള്ള കെട്ടിടത്തിന്റെ നിർമാണം ഉദ്ഘാടനം ചെയ്യുകയായിരുന്നു അദ്ദേഹം. രാജ്യാന്തര നിലവാരത്തിലുള്ള റോഡുകൾ നിർമിച്ചതോടെ പശ്ചാത്തല സൗകര്യ വികസനത്തിൽ ജില്ലയിലെ ഏറെ മുൻപന്തിയിലെത്തി. ഇത് ടൂറിസം രംഗത്തെ വളർച്ചയ്ക്കും ഏറെ സഹായിച്ചു. പൊതുവിദ്യാഭ്യാസ രംഗവും ഏറെ മെച്ചപ്പെട്ടു. . ഗുണമേന്മയുള്ള വിദ്യാഭ്യാസം സർക്കാർ ഉറപ്പാക്കിയതായും എം എം മണി പറഞ്ഞു. ചെമ്പകപ്പാറ സ്‌കൂളിന്റെ പുതിയ കെട്ടിടത്തിൽ രണ്ടാം നില പൂർണമായും മൂന്നും നാലും നിലകൾ കൂടിയും നിർമിക്കാനാവശ്യമായ തുക അടുത്ത ബജറ്റിൽ അനുവദിക്കുമെന്ന് എം.എൽ.എ ഉറപ്പുനൽകി.
സംസ്ഥാന സർക്കാരിന്റെ അടിയന്തര സഹായ പദ്ധതിയിൽ ഉൾപ്പെടുത്തി നവീകരിച്ച സയൻസ് ലാബും ജില്ലാ പഞ്ചായത്ത് ഫണ്ട് ഉപയോഗിച്ച് നവീകരിച്ച കമ്പ്യൂട്ടർ ലാബും ഉദ്ഘാടനം ചെയ്തു. ജില്ലാ പഞ്ചായത്ത് വിദ്യാഭ്യാസ സ്ഥിരംസമിതി അദ്ധ്യക്ഷൻ കെ ജി സത്യൻ അദ്ധ്യക്ഷനായി. ബ്ലോക്ക് പഞ്ചായത്തംഗം ലാലാച്ചൻ വെള്ളക്കട, ഇരട്ടയാർ പഞ്ചായത്ത് വൈസ് പ്രസിഡന്റ് രജനി സജി, ബിപിസി കെ ആർ ഷാജിമോൻ, പിടിഎ പ്രസിഡന്റ് എം എൻ രാജേഷ്, രമ്യ മനോജ്, അസ്മി സുരേഷ്, സി സുരേഷ്, ജി .അമ്പിളി എന്നിവർ സംസാരിച്ചു.