കുമളി: കുമളിയിൽ നിന്ന് മൂന്നാറിലേക്ക് പോവുകയായിരുന്ന യാത്രക്കാരന് ബസിൽ നിന്ന് നഷ്ടപ്പെട്ട സൃൂട്ട്കേസ് പൊലീസിന്റെ സമയബന്ധിതമായ ഇടപെടലിലൂടെ തിരികെ ലഭിച്ചു. കുമളി മൂന്നാം മൈലിൽ വെച്ചാണ് സ്യൂട്ട്കേസ് റോഡിലേക്ക് വീണത്. രാവിലെ കുമളിയിൽ നിന്ന് മൂന്നാറിലേക്ക് പുറപ്പെട്ട അൽഫോൻസ ബസിലെ യാത്രക്കാരന്റേതായിരുന്നു സൃൂട്ട്കേസ്. ബസിന്റെ സൈഡ് സ്റ്റോറേജിൽ വെച്ചിരുന്ന ബാഗ് മൂന്നാം മൈൽ ഭാഗത്ത് വെച്ച് താഴെ വീഴുന്നത് അതുവഴി കടന്നുപോയ മൂന്നാം മൈൽ സ്വദേശി പുളിക്കൽ അലന്റെ ശ്രദ്ധയിൽപ്പെട്ടു. ഉടൻ തന്നെ അലൻ പൊലീസ് കൺട്രോൾ റൂമിൽ വിവരമറിയിക്കുകയായിരുന്നു. കുമളി എസ്.ഐ. സലിം രാജും സി.പി.ഒ. പരമശിവവും സ്ഥലത്തെത്തി പരിശോധന നടത്തി. തുറന്നുനോക്കിയപ്പോൾ സൃൂട്ട്കേസിനുള്ളിൽ നിറയെ സുഗന്ധവ്യഞ്ജനങ്ങളായിരുന്നു. ബാഗ് നഷ്ടപ്പെട്ടതറിയാതെ ബസ് മുന്നോട്ട് പോവുകയായിരുന്നു. വണ്ടൻമേട്‌ പൊലീസ് സ്റ്റേഷനുമായി ബന്ധപ്പെട്ട് ബസിന്റെ നമ്പർ കൈമാറിയതിനെ തുടർന്ന്, പുറ്റടി പൊലീസ് ബസ് തടഞ്ഞുനിർത്തി. തുടർന്ന് നടത്തിയ അന്വേഷണത്തിൽ സൃൂട്ട്കേസ് ഉടമ ഒരു വിനോദസഞ്ചാരിയാണെന്ന് തിരിച്ചറിഞ്ഞു.സ്യൂട്ട്കേസ് നഷ്ടപ്പെട്ട വിവരം യാത്രക്കാരൻ അറിഞ്ഞിരുന്നില്ല. പിന്നീട് പൊലീസ് ഉടമസ്ഥന് കൈമാറി.