മൂന്നാർ: ഡബിൾ ഡക്കർ ബസ് അപകടത്തിൽപ്പെട്ട സംഭവത്തിൽ പൊലീസ് കേസെടുത്തു. മൂന്നാറിൽ വിനോദ സഞ്ചാരികൾക്കായി സൈറ്റ് സീൻ സർവ്വീസ് നടത്തുന്ന കെ.എസ്.ആർ.ടി.സി ഡബിൾ ഡക്കർ ബസ് കഴിഞ്ഞ ദിവസമായിരുന്നു അപകടത്തിൽപ്പെട്ടത്. ദേശീയപാതയിൽ ദേവികുളം ഇരച്ചിൽപാറയ്ക്ക് സമീപമായിരുന്നു അപകടം. വാഹനത്തിന്റെ നിയന്ത്രണം നഷ്ടമായതോടെ പാതയോരത്തെ ബസ് കാത്തിരിപ്പ് കേന്ദ്രത്തിലിടിച്ചു. പിന്നീട് റോഡരികിലെ മൺതിട്ടയിൽ ഇടിച്ച് വാഹനം നിന്നു. എതിരെ വന്ന കാറിൽ ഇടിക്കാതിരിക്കാൻ വെട്ടിച്ചപ്പോൾ ബസ് അപകടത്തിൽപ്പെട്ടുവെന്നായിരുന്നു സംഭവത്തിൽ ഡ്രൈവറുടെ വിശദീകരണം. എന്നാൽ അപകടത്തിന്റെ സി.സി ടി.വി ദൃശ്യങ്ങളിൽ കാ‌ർ ഇല്ല. സംഭവത്തിൽ പൊലീസ് കേസെടുത്തു. അപകട സമയത്ത് വാഹനത്തിൽ താഴെയും മുകളിലുമുള്ള ഡക്കറുകളിലായി നാല്പതിലധികം യാത്രക്കാരുണ്ടായിരുന്നു.