ഇടുക്കി: 2023ൽ ഗ്രൗണ്ടിന്റെ അഭാവം മൂലം പ്രവർത്തനം നിലച്ചുപോയ അത്ലറ്റിക്സ് സ്‌പോർട്സ് ഹോസ്റ്റലിന്റെ തുടർ പ്രവർത്തനങ്ങൾക്ക് അനുമതി ലഭിച്ചു. 2025 ജൂലായ് 20 ന് നടന്ന പ്രത്യേക സ്‌പോർട്സ് ഹോസ്റ്റൽ സെലക്ഷനിലുടെയാണ് കുട്ടികളെ തിരഞ്ഞെടുത്തിരിക്കുന്നത്. സംസ്ഥാന സ്‌പോർട്സ് കൗൺസിലിന്റെ സ്റ്റാന്റിംഗ് കമ്മറ്റി നിശ്ചയിച്ച മാർക്കിന്റെ അടിസ്ഥാനത്തിൽ 5 ആൺകുട്ടികൾക്കും 3 പെൺകുട്ടികൾക്കുമാണ് ഹോസ്റ്റലിലേയ്ക്ക് സെലക്ഷൻ ലഭിച്ചിരിക്കുന്നത്.

എം.എം.മണി എം.എൽ.എയുടെയും ജില്ലാ സ്‌പോർട്സ് കൗൺസിലിന്റെയും നിരന്തര ഇടപെടലിന്റെ ഫലമായാണ് സ്റ്റേറ്റ് സ്‌പോർട്സ് കൗൺസിൽ ജില്ലയ്ക്ക് മാത്രമായി ഈ അധ്യയന വർഷം അത്ലറ്റിക്സ് സ്‌പോർട്സ് ഹോസ്റ്റലിന് തുടർച്ചാനുമതി നൽകിയത്. നെടുങ്കണ്ടം പഞ്ചായത്ത് വാടക നൽകുന്ന കൽകൂന്തലിലെ സ്വകാര്യ കെട്ടിടത്തിലാണ് ഹോസ്റ്റൽ പ്രവർത്തിക്കുന്നത്.സ്വന്തമായി ഹോസ്റ്റൽ കെട്ടിടം പണിയുന്നതിന് 5 കോടി രൂപ അനുവദിക്കുകയും നെടുങ്കണ്ടം ടൗണിൽ സ്ഥലം കണ്ടെത്തുകയും ചെയ്തിട്ടുണ്ട്. ഇടുക്കി ജില്ലയിലെ കായിക മേഖലയിലെ കുട്ടികൾക്ക് വലിയ പ്രതീക്ഷയാണ് നെടുങ്കണ്ടം സിന്തറ്റിക് ട്രാക്കും പണി പൂർത്തിയായി വരുന്ന പച്ചടി ഇൻഡോർ സ്റ്റേഡിയവുമെന്ന് ജില്ലാ സ്‌പോർട്സ് കൗൺസിൽ പ്രസിഡന്റ് റോമിയോ സെബാസ്റ്റ്യൻ അറിയിച്ചു.