ഇടുക്കി: എൻജിനീയറിങ് വിഷയങ്ങളിൽ മലയാള പദസംഗ്രഹം തയ്യാറാക്കുന്നതിനുള്ള വിദഗ്ധസമിതി സമ്മേളനം ഇടുക്കി ഗവ. എഞ്ചിനീയറിങ് കോളേജിൽ ആരംഭിച്ചു. സമ്മേളനം 19ന് സമാപിക്കും. എഞ്ചിനീയറിങ് വിഷയങ്ങളിൽ പ്രയോഗിക്കുന്ന സാങ്കേതിക പദങ്ങൾ ഇംഗ്ലീഷ്, ഹിന്ദി, മലയാളം (മൂന്ന്) ഭാഷകളിലുമായി ഏകീകൃത രീതിയിൽ തയ്യാറാക്കുന്നതാണ് സമ്മേളനത്തിന്റെ പ്രധാന ലക്ഷ്യം. കേന്ദ്ര വിദ്യാഭ്യാസ മന്ത്രാലയത്തിന് കീഴിലുള്ള ശാസ്ത്രസാങ്കേതിക പദാവലി കമ്മീഷനാണ് സമ്മേളനം സംഘടിപ്പിക്കുന്നത്. ശാസ്ത്രസാങ്കേതിക പദാവലി കമ്മീഷൻ അസി. ഡയറക്ടർ ഡോ. സന്തോഷ് കുമാർ, ഗവ.എഞ്ചിനീയറിങ് കോളേജ് പ്രിൻസിപ്പാൾ ഡോ. ബൈജു ശശിധരൻ, അസിസ്റ്റന്റ് പ്രൊഫ. ഫിലുമോൻ ജോസഫ് എന്നിവരുടെ നേതൃത്വത്തിലാണ് സമ്മേളനം. എഞ്ചിനീയറിങ് കോളേജിലെ വിവിധ എഞ്ചിനീയറിംഗ് വിഭാഗങ്ങളിൽ നിന്നുള്ള അദ്ധ്യാപകരോടൊപ്പം കട്ടപ്പന ഗവ. കോളേജിലെയും മുരിക്കാശ്ശേരി പാവനാത്മ കോളേജിലെയും മലയാള ഭാഷാ വിദഗ്ധരും സമ്മേളനത്തിൽ പങ്കെടുത്തു.