 വികസന നേട്ടങ്ങൾ ജനങ്ങളിലെത്തിക്കുകയും ഭാവി വികസനത്തിനുള്ള ആശയരൂപീകരണവും ലക്ഷ്യം

ഇടുക്കി:സംസ്ഥാന സർക്കാരിന്റെ വികസന നേട്ടങ്ങൾ ജനങ്ങളിലെത്തിക്കുന്നതിനും ഭാവി വികസനത്തിനായുള്ള ആശയങ്ങളും നിർദേശങ്ങളും സ്വരൂപിക്കുകയും ചെയ്യുക എന്ന ലക്ഷ്യത്തോടെ സംഘടിപ്പിക്കുന്ന വികസന സദസ് ജില്ലയിൽ 22 മുതൽ ഒക്ടോബർ 20 വരെ നടക്കും. വികസന സദസിന്റെ സംസ്ഥാനതല ഉദ്ഘാടനം തിരുവനന്തപുരത്ത് നടക്കും. അതത് തദ്ദേശ സ്ഥാപനങ്ങളുടെ മേൽനോട്ടത്തിലാണ് വികസന സദസുകൾ സംഘടിപ്പിക്കുക. പഞ്ചായത്തുകളിൽ 250 മുതൽ 300 പേരും നഗരസഭകളിൽ 1000 പേരും വികസന സദസിൽ പങ്കെടുക്കും. രാവിലെ മുതൽ ഉച്ചവരെ നടക്കുന്ന സദസിൽ തദ്ദേശ സ്ഥാപനത്തിന്റെ വികസന നേട്ടങ്ങൾ ഉൾപ്പെടുന്ന പ്രോഗ്രസ് റിപ്പോർട്ട് പ്രകാശനം ചെയ്യും. സംസ്ഥാന സർക്കാരിന്റെ സർക്കാരിന്റെ വികസന നേട്ടങ്ങൾ അവതരിപ്പിക്കുന്ന വീഡിയോ അവതരണവും നടക്കും.

=അതിദാരിദ്ര്യ നിർമാർജനം/ലൈഫ് മിഷൻ പദ്ധതികളുടെ ഭാഗമായി ഭൂമി വിട്ടുനൽകിയവർ, ഹരിത കർമ്മ സേനാംഗങ്ങൾ തുടങ്ങി സർക്കാരിന്റെ വികസന പ്രവർത്തനങ്ങളിൽ പങ്കാളികളായവരെ ആദരിക്കും.

അതത് തദ്ദേശ സ്ഥാപനങ്ങളുടെ വികസന നേട്ടങ്ങളുടെ അവതരണം തദ്ദേശ സ്ഥാപന സെക്രട്ടറിമാർ നടത്തും. തുടർന്ന് പൊതുജനങ്ങളിൽ നിന്നുള്ള അഭിപ്രായവും നിർദേശങ്ങളും ആശയങ്ങളും അവതരിപ്പിക്കുന്ന ഓപ്പൺ ഫോറവും ചർച്ചയും നടക്കും. സംസ്ഥാനത്തിന്റെ പൊതുവായ വികസന ലക്ഷ്യങ്ങൾക്കൊപ്പം തദ്ദേശ സ്ഥാപന തലത്തിലെ വികസന നിർദേശങ്ങളും ചർച്ച ചെയ്യും. ജില്ലയിൽ വികസന സദസിന്റെ സംഘാടനവുമായി ബന്ധപ്പെട്ട് ജില്ലാ പഞ്ചായത്ത് ഹാളിൽ ആലോചനാ യോഗം ചേർന്നു. ജില്ലാ പഞ്ചായത്ത് പ്രസിഡന്റ് രാരിച്ചൻ നീറണാംകുന്നേൽ ഉദ്ഘാടനം ചെയ്തു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ കെ.ജി. സത്യൻ അദ്ധ്യക്ഷത വഹിച്ചു. ജില്ലാ ആസൂത്രണ സമിതി ഉപാധ്യക്ഷൻ സി.വി. വർഗീസ് മുഖ്യപ്രഭാഷണം നടത്തി. ജില്ലാ പ്ലാനിംഗ് ഓഫീസർ ദീപ ചന്ദ്രൻ, തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ ട്രീസ ജോസഫ്, ജില്ലയിലെ തദ്ദേശ സ്ഥാപന അധ്യക്ഷന്മാർ, സെക്രട്ടറിമാർ, യോഗത്തിൽ പങ്കെടുത്തു. വികസന സദസുമായി ബന്ധപ്പെട്ട് റിസോഴ്സ് പേഴ്സൺമാർക്കുള്ള പരിശീലനം കളക്ടറേറ്റ് മിനി കോൺഫറൻസ് ഹാളിൽ നടന്നു.

ജില്ലയിലെ വികസന

സദസുകൾ

22ന് ബൈസൺവാലി, കുമാരമംഗലം പഞ്ചായത്തുകളിലാണ് ജില്ലയിലെ ആദ്യ വികസന സദസ് നടക്കുക. 23ന് ചിന്നക്കനാൽ, ഉടുമ്പൻചോല, 24ന് ഏലപ്പാറ, ഇരട്ടയാർ, 25ന് കട്ടപ്പന നഗരസഭ, വണ്ടൻമേട്, വാഴത്തോപ്പ് പഞ്ചായത്തുകൾ, 26ന് കൊന്നത്തടി, 30ന് കാമാക്ഷി, കാഞ്ചിയാർ, കാന്തല്ലൂർ, ഒക്ടോബർ രണ്ടിന് അടിമാലി, 3ന് വെള്ളത്തൂവൽ, 5ന് കൊക്കയാർ, 6ന് മരിയാപുരം, മുട്ടം, 7ന് ഉടുമ്പന്നൂർ, അയ്യപ്പൻകോവിൽ, ആലക്കോട്, 8ന് മൂന്നാർ, 9ന് ഉപ്പുതറ, വാത്തിക്കുടി, വട്ടവട, മാങ്കുളം, കരിമണ്ണൂർ, പാമ്പാടുംപാറ, 10ന് വെള്ളിയാമറ്റം, കരുണാപുരം, ദേവികുളം, കോടിക്കുളം, 13ന് വണ്ണപ്പുറം, കുമളി, 14ന് ചക്കുപള്ളം, രാജാക്കാട്, 15ന് സേനാപതി, ശാന്തൻപാറ, ഇടമലക്കുടി, അറക്കുളം, 16ന് കരിങ്കുന്നം, കുടയത്തൂർ, നെടുങ്കണ്ടം, 17ന് വണ്ടിപ്പെരിയാർ, പുറപ്പുഴ, പെരുവന്താനം, 18ന് ഇടവെട്ടി, മണക്കാട്, പള്ളിവാസൽ, രാജകുമാരി, തൊടുപുഴ നഗരസഭ, 19ന് പീരുമേട്.