തലശ്ശേരി: അമ്മയും കുഞ്ഞും ആശുപത്രി പ്രവർത്തന സജ്ജമാവുന്നതോടെ കണ്ടിക്കൽ ഇനി തലശ്ശേരിയുടെ മെഡിക്കൽ ഹബ്ബായി മാറും. തലശ്ശേരി കണ്ടിക്കലിൽ എല്ലാ അത്യാധുനിക സൗകര്യങ്ങളോടും കൂടിയ ഏഴുനില കെട്ടിടമാണ് അമ്മയും കുഞ്ഞും ആശുപത്രിക്കായി കിഫ്ബി സഹായത്തോടെ ഒരുങ്ങുന്നത്. മുൻമന്ത്രി കോടിയേരി ബാലകൃഷ്ണന്റെ നേതൃത്വത്തിൽ ജനകീയമായി സമാഹരിച്ച 3.5 കോടി രൂപ ചെലവഴിച്ചാണ് ആശുപത്രിക്കായി സ്ഥലമേറ്റെടുത്തത്.

ആശുപത്രിയുടെ നിർമാണ പ്രവർത്തനങ്ങൾ ഡിസംബർ 31 നുള്ളിൽ പൂർത്തിയാക്കി ജനുവരി ആദ്യം ഉദ്ഘാടനം നടത്തും. നിലവിൽ ബിൽഡിംഗ് സ്ട്രക്ചറിന്റെ 80 ശതമാനം പ്രവൃത്തി പൂർത്തിയായി. ആശുപത്രി ഉപകരണങ്ങൾ വാങ്ങുന്നതിനും ഫർണിച്ചറുകൾ സജ്ജീകരിക്കുന്നതിനുമുള്ള നടപടികളും സമാന്തരമായി നടക്കുന്നുണ്ട്.
വരാനിരിക്കുന്ന അമ്മയും കുഞ്ഞും, തലശ്ശേരി ജനറൽ ആശുപത്രി എന്നിവയോട് ചേർന്ന് മലബാർ കാൻസർ സെന്ററിന്റെ ഒരു അനക്സ് വിഭാഗവും ആരംഭിക്കുന്നുണ്ട്. ഇതിനായി പ്രദേശത്തെ ഗുണ്ടർട്ട് ഫൗണ്ടേഷന്റെ ഭൂമി എം.സി.സിക്ക് കൈമാറിയിട്ടുണ്ട്. സംസ്ഥാന സർക്കാരിന്റെ കീഴിൽ ലാഭേച്ഛയില്ലാതെ പ്രവർത്തിക്കുന്ന മലബാർ കാൻസർ സെന്ററിന് ജനങ്ങളുടെ ആശ്രയ കേന്ദ്രമാകുവാൻ ഇതിനോടകം സാധിച്ചിട്ടുണ്ട്.

തലശ്ശേരി കോട്ടയോട് ചേർന്ന് സ്ഥിതി ചെയ്യുന്ന അപകടാവസ്ഥയിലായ തലശ്ശേരി ജനറൽ ആശുപത്രി ഇതിന് സമീപത്തായി മാറ്റി സ്ഥാപിക്കാനുള്ള നടപടികളും പരോഗമിക്കുകയാണ്. തലശ്ശേരി മാഹി ബൈപ്പാസിൽ നിന്നും ഒരു കിലോമീറ്ററിൽ താഴെ മാത്രം ദൂരത്തിൽ സ്ഥിതിചെയ്യുന്ന ഈ സ്ഥാപനങ്ങൾ പ്രവർത്തനം ആരംഭിക്കുന്നതോടുകൂടി തലശ്ശേരി പട്ടണം തിരുവങ്ങാട്, കോടിയേരി ഭാഗത്തേക്ക് കൂടെ വ്യാപിക്കും. ഈ ടൗൺഷിപ്പ് വികസിക്കുന്നതോടുകൂടി വാണിജ്യ, സാമ്പത്തിക, അടിസ്ഥാന സൗകര്യ വികസന മേഖലകളിൽ കണ്ണഞ്ചിപ്പിക്കുന്ന പരോഗതിക്കാണ് നാട് സാക്ഷ്യം വഹിക്കുക.

ഏറ്റവും വിശ്വാസ്യതയുള്ള

സ്ഥാപനമായി എം.സി.സി

റോബോട്ടിക് ശസ്ത്രക്രിയ, കാർ ടി സെൽ തെറാപ്പി, ഒക്യുലാർ ഓങ്കോളജി, ഹെമറ്റോപോയിറ്റിക് സ്റ്റം സെൽ ട്രാൻസ് പ്ളാന്റേഷൻ ചികിത്സകൾക്കുള്ള സംസ്ഥാനത്തെ ഏറ്റവും വിശ്വാസ്യതയുള്ള സർക്കാർ സ്ഥാപനമായി എം.സി.സി മാറി. ദക്ഷിണേന്ത്യയിലെ ഏറ്റവും മികച്ച ക്യാൻസർ ചികിത്സാ കേന്ദ്രമെന്ന അംഗീകാരവും ഇതിന് ലഭിച്ചു. ചികിത്സയും പഠന സൗകര്യങ്ങളും ഉൾക്കൊള്ളുന്ന 97.65 കോടി രൂപയുടെ പുതിയ ബ്ലോക്ക്, രോഗികളുടെ സേവനങ്ങൾ മെച്ചപ്പെടുത്താൻ നിർമ്മിച്ച നൂതന ലബോറട്ടറികൾ, ഓപ്പറേഷൻ തീയേറ്ററുകൾ, ഇൻഫ്യൂഷൻ മോണിറ്ററിംഗ് സംവിധാനം എന്നിവ മലബാർ കാൻസർ സെന്ററിന്റെ സേവന നിലവാരം ഉയർത്തുകയാണ്.