പാലാ : പാലായിലെ ഒൻപത് പഞ്ചായത്തുകളിൽ മിനി മാസ്റ്റ് ലൈറ്റുകൾ സ്ഥാപിക്കുന്നതിന് 62.28 ലക്ഷം രൂപയുടെ ഭരണാനുമതി ലഭിച്ചതായി മാണി സി കാപ്പൻ എം.എൽ.എ പറഞ്ഞു. എം.എൽ.എയുടെ ആസ്തിവികസന ഫണ്ടിൽ നിന്നാണ് വിവിധ സ്ഥലങ്ങളിൽ ലൈറ്റ് സ്ഥാപിക്കുന്നത്. കരൂർ, ഭരണങ്ങാനം, രാമപുരം, എലിക്കുളം, മീനച്ചിൽ, കടനാട്, തലപ്പുലം, തലനാട്, മേലുകാവ് പഞ്ചായത്തുകളിലാണ് പദ്ധതി നടപ്പാക്കുന്നത്. 2024 - 25 സാമ്പത്തിക വർഷത്തെ ആസ്തി വികസന ഫണ്ടിൽ നിന്നുള്ള തുക ഉപയോഗിച്ച് 32 ലൈറ്റുകളാണ് സ്ഥാപിക്കുന്നത്. 2025 26 സാമ്പത്തിക വർഷത്തെ ഫണ്ട് ഉപയോഗിച്ച് 13 ലൈറ്റുകൾ കൂടി അനുവദിച്ചിട്ടുണ്ട്. ഭരണാനുമതി ലഭിക്കുന്ന മുറയ്ക്ക് ഇവ കൂടി സ്ഥാപിക്കും. ഭരണ, പ്രതിപക്ഷ വ്യത്യാസമില്ലാതെ പഞ്ചായത്ത് ഭരണ സമിതി അംഗങ്ങളും വിവിധ രാഷ്ട്രീയ, സാമൂഹ്യ നേതാക്കളും ആവശ്യപ്പെട്ടതനുസരിച്ചാണ് ലൈറ്റുകൾ അനുവദിച്ചിരിക്കുന്നതെന്ന് എം.എൽ.എ. പറഞ്ഞു. കളക്ടറുടെ അദ്ധ്യക്ഷതയിൽ കൂടിയ യോഗമാണ് പദ്ധതിയ്ക്ക് ഭരണാനുമതി നൽകിയത്. ടെണ്ടർ നടപടി പൂർത്തീയാക്കി സങ്കേതികാനുമതി ലഭിക്കുന്നതോടെ ലൈറ്റുകൾ സ്ഥാപിക്കും.

ലൈറ്റുകൾ വേണോ, അറിയിക്കാം

പാലാ നിയോജകമണ്ഡലത്തിൽ മിനി മാസ്റ്റ് ലൈറ്റുകൾ ആവശ്യമുള്ള ബാക്കി കേന്ദ്രങ്ങളിൽ കൂടി ഉടൻ സ്ഥാപിക്കാൻ നടപടി സ്വീകരിക്കുമെന്ന് എം.എൽ.എ. പറഞ്ഞു. അടിയന്തരമായി ലൈറ്റുകൾ സ്ഥാപിക്കേണ്ട കേന്ദ്രങ്ങളെപ്പറ്റിയുള്ള വിവരം എം.എൽ.എ.യുടെ പാലായിലെ ഓഫീസിൽ പൊതുജനങ്ങൾക്ക് അറിയിക്കാം.