തലയോലപ്പറമ്പ്: തലയോലപ്പറമ്പ് ജംഗ്ഷനിൽ പ്രവർത്തിക്കുന്ന ഗവ.യു പി സ്‌കൂളിൽ മോഷണശ്രമം. ഇന്നലെ പുലർച്ചെയാണ് സംഭവം. ഓഫീസ് മുറിയുടെ മുൻവശത്തെ താഴ് തകർത്ത് അകത്ത് കയറിയ മോഷ്ടാവ് ഓഫീസിനുള്ളിലെ രണ്ട് അലമാരകളും രണ്ട് മേശകളും കുത്തിത്തുറന്നു.ഇന്നലെ രാവിലെ സ്‌കൂൾ ജീവനക്കാർ എത്തിയപ്പോഴാണ് മോഷണ വിവരം അറിയുന്നത്.തുടർന്ന് തലയോലപ്പറമ്പ് പൊലീസിൽ വിവരം അറിയിക്കുകയായിരുന്നു.
5 ലാപ്പ്‌ടോപ്പ് അടക്കം ഓഫീസ് റൂമിൽ ഉണ്ടായിരുന്നെങ്കിലും അവ നഷ്ടപ്പെട്ടിട്ടില്ല.സംഭവം അറിഞ്ഞ് എ.ഇ.ഒ കെ.സി.ദീപ ഉൾപ്പെടെ സ്‌കൂളിലെത്തി. പ്രാഥമിക പരിശോധനയിൽ ഒന്നും നഷ്ടപ്പെട്ടിട്ടില്ലെന്ന് സ്‌കൂൾ അധികൃതർ പറഞ്ഞു. 2 മാസം മുൻപ് സമീപത്തുള്ള ബഷീർ സ്മാരക സ്‌കൂളിലും മോഷണം നടന്നിരുന്നു. വൈകിട്ട് കോട്ടയത്ത് നിന്നും ഗോഡ് സ്‌ക്വാഡ് സ്ഥലത്തെത്തി പരിശോധന നടത്തിയെങ്കിലും യാതൊരു സൂചനകളും ലഭിച്ചില്ല.സംഭവത്തിൽ പൊലീസ് അന്വേഷണം ഊർജ്ജിതമാക്കി.